अंजोर.रायपुर, 26 जुलाई। नगर पालिका परिषद मुंगेली के परमहंस वार्ड म 300 मीटर नाली निर्माण करे बिना ही ठेकेदार ल 13 लाख रूपिया ले जादा के भुगतान करे के मामला के नगरीय प्रशासन अउ विकास मंत्री डॉ. शिवकुमार डहरिया ह गंभीरता ले लिस। प्रकरण के संज्ञान म आते ही मंत्री ह नगर पालिका परिषद मुंगेली के मुख्य नगर पालिका अधिकारी विकास पाटले, उप अभियंता जोयस तिग्गा, लेखापाल आनंद निषाद, सहायक राजस्व निरीक्षक सियाराम साहू ल नगरीय प्रशासन अउ विकास विभाग डहर ले तुरते प्रभाव ले निलंबित करके दे गे हावय। ए मामला म नगर पालिका परिषद मुंगेली अध्यक्ष संतूलाल सोनकर ल कारण बताओं सूचना जारी करे के संग ही सरी प्रकरण के जांच अउ दोषी के विरूद्ध एफआईआर दर्ज कराये कलेक्टर मुंगेली ल चिट्ठी पठोय गे हावयं।
जानबा होवय के नगर पालिका परिषद मुंगेली ले परमहंस वार्ड म होरीलाल शर्मा के घर ले गार्डन के बाउण्ड्रीवाल होवत स्टेडियम तक 300 मीटर नाली निर्माण बुता होना नइ पाये गिस, अउ मेसर्स सोफिया कंस्ट्रक्शन एण्ड सप्लायर अकलतरा जिला जांजगीर-चांपा ल बिना बुता कराए, ये बुता बर रकम 13,21,818 रूपिया के भुगतान कर दे गे हावय। ए मामला के जानकारी लगते ही नगरीय प्रशासन अउ विकास मंत्री डॉ. डहरिया ह लघियात कार्रवाई करत नगर पालिका परिषद मुंगेली के मुख्य नगर पालिका अधिकारी, उप अभियंता, लेखापाल, सहायक राजस्व निरीक्षक सहित ए प्रकरण म संलिप्त सबो के विरूद्ध कार्यवाही करे के निर्देश दिस। प्रकरण के गंभीरता के देखत नगरीय प्रशासन अउ विकास विभाग डहर ले सबो ल तुरते प्रभाव ले निलंबित करे के आदेश भी जारी करके दे गे हावय। निलंबित सबो अधिकारी अउ कर्मचारी मन के निलंबन बखत म मुख्यालय,कार्यालय संयुक्त संचालक, नगरीय प्रशासन अउ विकास, क्षेत्रीय कार्यालय बिलासपुर नियत करे गे हावय।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।