रायपुर, 15 जुलाई 2021। मुख्यमंत्री भूपेश बघेल ह बिजली कंपनी म ढाई हजार ले जादा पद म भरती करे के निर्देश दे हावयं। एमे जूनियर इंजीनियर ले लेके मैदानी स्तर म काम करे वाला लाइन अटेंडेंट के पद हावयं, जेमे छत्तीसगढ़ के स्थानीय निवासी मन ल नियुक्ति दे जाही। छत्तीसगढ़ राज्य बने के बाद पॉवर कंपनी म पहिली बार अतका संख्या म एकमुश्त भरती के निर्देश दे गे हावयं।
ऊर्जा विभाग के विशेष सचिव अउ पॉवर कंपनी के चेयरमेन अंकित आनंद ह बताइन के राज्य बने के बाद प्रदेश म विद्युत उत्पादन ले लेके उपभोक्ता मनके संख्या म काफी बड़वार होए हावय। विद्युत उत्पादन क्षमता 1360 मेगावाट ले बढ़कर 3224 मेगावाट हो गे हावय। राज्य बने के समय 18.91 लाख उपभोक्ता रिहिस, वो ह बढ़के 56 लाख हो गे हावय। ए लिहाज ले गुणवत्तापूर्ण बिजली आपूर्ति अउ उपभोक्ता के समस्या के लघियात निराकरण के खातिर मैदानी अमला म खाली पद के भरती जरूरी हावय।
छत्तीसगढ़ स्टेट पॉवर वितरण, पारेषण अउ जनरेशन कंपनी म लगभग 2583 पद म भरती करे जानी हावय। ये पद उपभोक्ता मनके विद्युत सेवा दे के दृष्टि ले बहुत जरूरी हावयं। ये पद मैदानी कार्यालय म भरे जाही। एमे जूनियर इंजीनियर के 340 पद, डाटा एंट्री आपरेटर के 610 अउ परिचारक लाइन (प्रशिक्षु) के 1500 भरे जाही। संग ही पॉवर कंपनी के औषधालय म खाली पद के भरती करे जाही। मुख्यमंत्री जी ह ये पद म भरती के निर्देश दे हावयं, जल्दी ही ये पद म भरती के बर विज्ञापन जारी करे जाही। जानबा होवय के पॉवर कंपनी म काफी संख्या म जूनियर इंजीनियर मनके प्रमोशन करके असिस्टेंट इंजीनियर बनाये हावय, जेकर बाद जूनियर इंजीनियर के पद खाली हावयं। ये पद म नवा नियुक्ति करे जाही। संग ही निचले मैदानी स्तर म बड़े पैमाना म लाइन स्टाफ के सरलग भरती करे जाही। एमे 950 पद तृतीय श्रेणी के अउ 1549 पद चतुर्थ श्रेणी के हावयं। ए रकम ले कुल 2583 पद म भरती के निर्देश दे गे हावयं।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।