भारतीय डाक विभाग के नवाचार : स्पीड पोस्ट ले होही हरिद्वार, प्रयागराज, गया अउ वाराणसी म अस्थि विसर्जन

अंजोर.रायगढ़, 5 जुलाई 2021। कोरोना महामारी के धियान म रखत, अइसे लोगन जेन अपन घर वाला के मृत्यु होए म अस्थि विसर्जन अउ श्राद्ध अनुष्ठान के खातिर पवित्र जगह म नइ जा पा हावय। येकर खातिर भारतीय डाक विभाग डहर ले ओम दिव्य दर्शन संस्था के संग मिलके एक नवा सेवा सुरू करे हावय। जेमा डाक विभाग के स्पीड पोस्ट के माध्यम ले अस्थि विसर्जन के खातिर हरिद्वार, प्रयागराज, गया अउ वाराणसी भेजही। जिहां उंकर विसर्जन अउ अनुष्ठान भी कराये जाही अउ ये श्राद्ध कार्यक्रम के लाइव वेबकास्ट शोक संतप्त परिवार के सदस्य मन ल कराये जाही। ताकि श्राद्ध कार्यक्रम म परिजन ऑनलाइन शामिल होके मृत आत्मा के शांति के खातिर प्रार्थना कर सके। येकर अलावा घर वाला ल एक बोतल गंगाजल भी डाक डहर ले भेजे जाही।

ये सेवा के लाभ ले के खातिर सबले पहिली ओम दिव्य दर्शन संस्था के वेब साईट http://omdivyadarshan.org पोर्टल म रजिस्ट्रेशन करना होही। ए बखत भरे गे फार्मेट के मुताबिक संबंधित जगह के पंडित के नाम, पता, मोबाईल नंबर अउ श्राद्ध के तिथि मेसेज के माध्यम ले आवेदक ल मिल जाही। जेकर बाद ये निर्देश के मुताबिक अस्थि ल अच्छा रकम ले सुरक्षित पैक करके अउ पैकिंग के ऊपर बोल्ड लेटर म “Om Divya Darshan” लिखके हरिद्वार, प्रयागराज, गया या वाराणसी म स्पीड पोस्ट के माध्यम ले भेजना होही। ये स्पीड पोस्ट म भेजने वाला के भी नाम, पूरा पता अउ मोबाईल नंबर देना अनिवार्य हावय। स्पीड पोस्ट के शुल्क अस्थि के वजन अउ गंतव्य ठऊर के मुताबिक प्रेषक ल ही वहन करना होही। चिन्हांकित ठऊर म डाक विभाग डहर ले अस्थि ल लघियात वितरण कराये जाही। येकर बाद बुक करे गे तारीख अउ समय के स्लॉट म संस्था के अधिकृत पंडित डहर ले कर्मकांड के संग अस्थि विसर्जन अउ श्राद्ध कार्यक्रम ल लाइव वेबकास्ट प्रसारित करे जाही।