वजन तिहार : सारागांव आंगनबाड़ी म शुभारंभ करिस विधानसभा अध्यक्ष डॉ. महंत अउ श्रीमती ज्योत्सना महंत

अंजोर.जांजगीर-चांपा, 6 जुलाई 2021। छत्तीसगढ़ के विधानसभा अध्यक्ष डॉ. चरणदास महंत अउ लोकसभा सांसद श्रीमती ज्योत्सना महंत ह आज जांजगीर-चांपा जिला के नगर पंचायत सारागांव म अपन निवास परिसर म जिला स्तरीय वजन तिहार के उद्घाटन करिन। ए मउका म 12 महीना के नन्हें सम्राट अउ 21 महीना के शौर्य के वजन अउ ऊंचाई नापे गे। दुनों के वजन पोषण के सामान्य स्तर श्रेणी म पाये गिस। विधानसभा अध्यक्ष अउ सांसद श्रीमती ज्योत्सना महंत ह दुनों लइका ल उंकर उज्जवल भविष्य के शुभकामना दीस। 

विधानसभा अध्यक्ष डॉ. महंत ह उपस्थित अधिकारी मन ले किहिन के लक्ष्य के मुताबिक शत-प्रतिशत लइका के पोषण स्तर के जांच पूरा करें। कुपोषित अउ गंभीर कुपोषित लइका के योजना के मुताबिक लाभान्वित अउ उपचार करके पोषण के सामान्य स्तर म लाएं। येकर खातिर स्वास्थ्य विभाग के संग समन्वय करके लक्ष्य पूरा करें। महिला अउ बाल विकास विभाग के जिला कार्यक्रम अधिकारी श्रीमती प्रीति खोखर चखियार ह बताइन के जिला म 7 जुलाई ले 16 जुलाई तक वजन तिहार के आयोजन करे जात हावय। तिहार के बखत सबो आंगनबाड़ी केन्द्र म 0 ले 5 साल तक के लइका के वजन अउ ऊंचाई के मापे जाही। लइका के कुपोषित अउ गंभीर कुपोषित पाए जाये म उंकर समुचित उपचार अउ योजना मन के लाभ देके पोषण के सामान्य स्तर म लाने के प्रयास करे जाही। 

तिहार के बखत किशोरी नोनी मन के हीमोग्लोबिन के जांच करे जाही। एनीमिक पाए जाये म आयरन फोलिक एसिड दवई दे जाही। ए मउका म जिला पंचायत सीईओ गजेंद्र सिंह ठाकुर, डीएफओ श्रीमती प्रेमलता यादव, एसडीएम चांपा सुभाष राज, दिनेश शर्मा, श्रीमती रश्मि गबेल, देवश सिंह, सुश्री शशिकांता राठौर, आभास बोस, विवेक सिसोदिया, प्रिंस शर्मा, मदन लाल अग्रवाल सहित जनप्रतिनिधि उपस्थित रिहिस।