Raipur District : खाद्य विभाग के छापा म भारी अकन चोरी के डीजल-पेट्रोल सहित 2 टैंकर जप्त

अंजोर
0

अंजोर.रायपुर, 14 जून 2021। खाद्य विभाग के टीम ह मंदिर हसौद के साईं कालोनी म छापा मार करके अवैध रूप ले डीजल चोरी के बड़े गिरोह के भंडाफोड़ करत हिंदुस्तान पेट्रोलियम के मंदिर हसौद ले निकले आरंग अउ बसना के पेट्रोल पम्प के खातिर निकले 2 टैंकर ले डीजल चोरी के प्रकरण बनाके 29 हज़ार लिटर डीज़ल, 10 हज़ार लिटर पेट्रोल सहित 3 वाहन जप्त करके एमएस, एचएसडी अनुज्ञापन आदेश 1980 के उपबन्ध के उल्लंघन के प्रकरण बनाये हावय।

मिले आरो के मुताबिक कलेक्टर के निर्देश म खाद्य विभाग के टीम ह मंदिर हसौद ले चंदखुरी रोड के साईं कालोनी म छापा मारिस। जिला खाद्य नियंत्रक रायपुर ह मउका म हिंदुस्तान पेट्रोलियम कम्पनी के दू टैंकर सीजी 04 एमएच 2921, सीजी 07 बी के 6385 ले उहां चालक डहर ले सीलबंद चेम्बर ल खोलके डीजल निकाल के अवैध रूप ले गोलू नाम के मनखे ल 60 रूपिया लिटर के दर ले बेचे जात रिहिस। खाद्य विभाग के टीम ह दुनों टैंकर के चालक रंजीत,  मोहम्मद इरफान ले मउका म बयान लेके जानकारी लिस। दुनों वाहन आरंग औऱ बसना के खातिर रवाना होइस रिहिस फेर मंदिर हसौद ले चंदखुरी रोड म पकड़ा गे। मउका म 20-20 लिटर  डीजल अलग ले दू कंटेनर म निकले पाये गिस। मउका म एक लावारिस वाहन क्रमांक सीजी 04 एम एस 7724 खड़ा पाये गिस जेमा 5 ड्रमों म 800 लिटर डीजल रखे पाये गिस। ये डीजल भी टेंकर ले निकाल के अवैध रूप ले रखे गे रिहिस। 

खाद्य विभाग के टीम ह एमएस, एचएसडी अनुज्ञापन आदेश 1980 के धारा के उल्लंघन करे जाये के सेती 29 हज़ार लिटर डीजल, 10 हज़ार लिटर पेट्रोल, सहित 3 वाहन जप्त करके थाना प्रभारी मंदिर हसौद के अभिरक्षा म देगे हावय। ये कार्यवाहीम खाद्य विभाग के टीम म सहायक खाद्य अधिकारी द्वय संजय दुबे, मदनमोहन साहू,खाद्य निरीक्षक मनीष यादव, सोनल चंद्राकर,  श्वेता दीवान अउ रीना साहू शामिल रिहिस।

एक टिप्पणी भेजें

0टिप्पणियाँ

सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।

एक टिप्पणी भेजें (0)

#buttons=(Accept !) #days=(20)

Our website uses cookies to enhance your experience. Check Now
Accept !