छत्तीसगढ़ म शुरू होही पर्वतारोहण अकादमी, नैना सिंह धाकड़ ह मुख्यमंत्री ले करिस मुलाकात

अंजोर.रायपुर, 14 जून 2021। मुख्यमंत्री भूपेश बघेल ह किहिन हावय के प्रदेश म एडवेंचर स्पोटर्स ल बढ़ावा दे के खातिर छत्तीसगढ़ म जल्दी  ही पर्वतारोहण अकादमी सुरू करे जाही। ये अकादमी बस्तर म शुरू होही। मुख्यमंत्री श्री बघेल ह निवास कार्यालय म छत्तीसगढ़ के युवा पर्वतारोही नैना सिंह धाकड़ ले मुलाकात के बखत ये घोषणा करिस। नैना सिंह ह मुख्यमंत्री ल बताइन के ओला एक जून के दुनिया के सबले ऊंची चोटी माऊंट एवरेस्ट फतह करे म सफलता मिले हावय। मुख्यमंत्री ह ए शानदार उपलब्धि के खातिर नैना सिंह ल बधाई दीस। ओमन किहिन के ए उपलब्धि ले छत्तीसगढ़ के गौरव बढ़े हावय। श्री बघेल ह नैना सिंह के उंकर उज्जवल भविष्य के खातिर शुभकामना दीस।

मुख्यमंत्री श्री बघेल ले मुलाकात के बखत पर्वतारोही नैना सिंह धाकड़ ह बताइन के वो जगदलपुर जिला मुख्यालय ले 17 किलोमीटर दूरिहा टाकरागुड़ा गांव के आए, वो साल 2010 ले पर्वतारोहण ले जुड़े हावयं। एनएसएस के जरिए येकर शुरूआत होइस। ओमन बताइन के एक जून के दुनिया के सबले ऊंची चोटी माऊंट एवरेस्ट के फतह करे के पहिली 23 मई के 8 हजार 516 मीटर ऊंची माऊंट लोहत्से म भी ओमन सफलता पूर्वक चढ़ाई करिन। ये दुनों ही चोटी के फतह करइया वो देश के दूसरइया महिला पर्वतारोही हावयं। ओमन बताइन के एवरेस्ट म फतह करइया राज्य के दूसरइया महिला हावय। येकर ले पहिली 1993 म भिलाई के सविता धपवाल ह बछेंद्री पाल के संग एवरेस्ट म पहुंचे रिहिस।