Gariyaband Police : दहेज प्रताड़ना ले तंग आके नवविवाहिता करिस आत्महत्या, बात छुपाये खातिर कर दिस दाह संस्कार अब पति, सास, ससुर सहित 06 जेल म

अंजारे.गरियाबंद, 11 जून 2021। जिला गरियाबंद के आदिवासी ब्लॉक छुरा ले 25 किलोमीटर दूरिहा स्थित गांव गायडबरी जिहां साल 2019 म मृतिका रोशनी कुलदीप के बिहाव बोधन राम कुलदीप के संग रीति रिवाज ले होइस रिहिस। बिहाव के कुछ ही समय बाद दहेजलोभी पति, सास अउ ससुर डहर ले रोशनी ल आये दिन दहेज मांग अउ घरेलू बात ल लेके प्रताडित करे लगे रिहिस। करीब 02 साल ले मानसिक अउ शारीरिक प्रताडना झेलत नवविवाहिता अपन व्यथा अपन माइके म अपन पिता किशनलाल सोनवानी ल बताये रिहिस। 

रोज-रोज के प्रताड़ना ले तंग आके 25 मई के संझा के गांव के गउठान के पास फासी लगाके आत्महत्या कर लिस। जइसे ही ए बात के खबर मृतिका के पिता किशनलाल ल चलिस वो ह घटना के दूसर दिन ही गायडबरी पहुंचगे जिहां मृतिका के पति बोधन राम डहर ले अपन पिता परदेशी राम कुलदीप अउ परिजन सोनूराम, तुलसीराम अउ मुकेश के संग मिलके घटना के वास्तविकता छुपाये के नियत ले अउ मृतिका के माइके वालो के आये के पहिली ही रात म मृतिका के शव ल फांसी के फंदा ले उतारके अतिम दाह संस्कार दे रिहिस अउ साक्ष्य छुपाये के नियत ले मृतिका के जले अस्थि अउ राख ल तालेसर बांध म विसर्जित कर दिस। 

ए बात के रिपोर्ट किशनलाल सोनवानी डहर ले 05 जून के थाना छुरा म करे जाये म थाना प्रभारी निरीक्षक संतोष भुआर्य डहर ले प्रकरण के गंभीरता के मुताबिक तुरते अपन वरिष्ठ अधिकारी मनला मामला के पूरा जानकारी देत मर्ग कायम करके मर्ग जांच पंचनामा कार्यवाही कार्यपालिक दण्डाधिकारी छुरा ल कराये गिय। मर्ग जांच म नवविवाहिता रोशनी कुलदीप डहर ले अपन ससुराल वाला ले दहेज मांग के प्रताड़ना ले व्यथित होके फांसी लगाके आत्महत्या करना पाये गिस। थाना प्रभारी डहर ले आरोपी मनके विरूद्ध 7 जून के दहेज मृत्यु के प्रकरण पंजीबद्ध करके विवेचना करे जात रिहिस। जेमा 11 जून के अनुविभागीय अधिकारी गरियाबंद संजय ध्रुव के नेतृत्व म एक संयुक्त टीम के गठन करके आरोपी मनके पतासाजी करके उंकर निवास ठऊर म तडके दबिश देके आरोपी मन ल हिरासत म लेके पूछताछ करे गिस जेमा अपराध स्वीकार करे म गिरफ्तार आरोपी बोधन राम, परदेशी राम, श्रीमति कौशिल्या बाई, तुलसी राम, सोनूराम कुलदीप, मुकेश कुमार नेताम मनला न्यायिक रिमांड म जेल भेजा गे हावय।