भटगांव म लेमनग्रास ले तेल निकाले के मशीन, महिला समूह ल मिलथे दुगुना फायदा

अंजोर.धमतरी, 4 जून 2021। धमतरी के सोरम-भटगांव म अब जय मां भवानी समूह न केवल लेमनग्रास के खेती करही, बल्कि स्वयं मशीन के जरिए लेमनग्रास के तेल भी निकालही। आज कलेक्टर अउ मुख्य कार्यपालन अधिकारी जिला पंचायत के उपस्थिति म समूह ह मशीन ले लेमनग्रास के तेल निकाले के काम शुरू करिन। जानबा होवयके सोरम-भटगांव के 12 एकड़ बंजर भूमि ल उपयोगी बनाये के खातिर महात्मा गांधी राष्ट्रीय ग्रामीण रोजगार गारंटी योजना अउ 14 वें वित्त आयोग ले भूमि सुधार करे गिस। भूमि सुधार के बाद उद्यानिकी विभाग महिला समूह ल लेमनग्रास के खेती करे के प्रशिक्षण अउ क्रेडा डहर ले सिंचाई बेवस्था के खातिर पम्प कनेक्शन लगाये गिस। ये सेती सोरम म नौ एकड़ अउ भटगांव म तीन एकड़ क्षेत्र म लेमनग्रास के खेती करे जात हावय। 

इहां पाछु डेढ़ साल ले लेमनग्रास के खेती करके जय मां भवानी स्व-सहयता समूह के अध्यक्ष श्रीमती किरणलता साहू के बताती पहिली म ओला तेल निकलवाये के खातिर निजी वेंडर म निर्भर होना पड़त रिहिस। येकर ले वाहन के किराया अउ समय के नुकसान त होवे, संग ही प्रति एकड़ 30 हजार रूपिया तक के ही आमदनी हो पात रिहिस। वो खुश होके बताइन के भटगांव म लेमनग्रास ले तेल निकाले के संयंत्र स्थापित होये ले अब उंकर आय म दुगुना इजाफा होही अउ प्रति एकड़ 50-60 हजार रूपिया के आमदनी होए के संभावना हावय। 

ओमन ये भी बताइन के जिला के आने-आने विकासखण्ड के 100 एकड़ क्षेत्र के खातिर कार्ययोजना बनाये गे हावय जेमा बिहान के महिला मन डहर ले लेमनग्रास अउ आन औषधीय पौधा के विस्तार करे जाना हावय। इही सेती वो क्षेत्र ले भी लेमनग्रास के तेल इही मशीन ले निकाले जाही, जेकर ले बाकी समूह के महिला मन भी लाभान्वित होही। 

भटगांव म स्थापित तेल निकाले के मशीन ले एक बार म 600 किलो लेमनग्रास ले चार लिटर तक तेल निकाले जा सकत हावय। ये तेल बहुत ही उपयोगी होथे। येकर उपयोग सौंदर्य प्रसाधन, मच्छर अगरबत्ती, साबून इत्यादि बनाये म करे जात हावय। बाजार म ए तेल के कीमत 1100 ले 1500 रूपिया प्रति लिटर हावय। जय मां भवानी स्व-सहायता समूह के उम्मीद हावय के बाजार म ए तेल के बेचे ले उंकर आय म अच्छा खासा इजाफा होही।