डोंगरगढ़ म तको खुलिस स्वामी आत्मानंद शासकीय उत्कृष्ट अंग्रेजी माध्यम विद्यालय, कलेक्टर करिस निरीक्षण

अंजोर.राजनांदगांव, 4 जून 2021। स्वामी आत्मानंद शासकीय उत्कृष्ट अंग्रेजी माध्यम विद्यालय विकासखंड मुख्यालय डोंगरगढ़ म सुरू करे गे हावय। शासकीय बालक उच्चतर माध्यमिक विद्यालय म उत्कृष्ट अंग्रेजी माध्यम विद्यालय के कक्षा सुरू करे जाही। 1 करोड़ 50 लाख रूपिया के लागत ले स्कूल भवन के जीर्णोद्धार अउ नवा भवन के निर्माण करे जाही। 

मिले आरो के मुताबिक कलेक्टर टोपेश्वर वर्मा ह अंग्रेजी माध्यम स्कूल भवन के खातिर डोंगरगढ़ के बालक उच्चतर माध्यमिक विद्यालय के स्कूल भवन के निरीक्षण करिन। ओमन किहिन के शासन के मंशा मुताबिक ये स्कूल म कक्षा पहिली ले 12वीं तक अंग्रेजी माध्यम म शिक्षा दे जाही। येकर खातिर भवन के निर्माण जल्दीक ही सुरू करे जाए अउ समय म एला पूरा करें। स्कूल भवन के निर्माण सबो आवश्यकता ल धियान म रखत योजनाबद्ध तरीका ले करे जाए। पढ़ईया मन के खातिर पर्याप्त कक्ष, पुस्तकालय, स्पोर्ट रूम, प्रायोगिक कक्ष, कम्प्यूटर कक्ष, फर्नीचर अउ आन सबो सुविधा होनी चाही। ओमन किहिन के भवन के निर्माण एक कोति ले करे जाना चाही, जेकर ले कक्षा नइ प्रभावित हो।