छत्तीसगढ़ी फिल्म निर्माण नीति बर होइस बइठक : सतीश जैन, मनोज वर्मा, पुष्पेन्द्र, योगेश अग्रवाल, अनुज शर्मा, राजेश अवस्थी सहित कई निर्देशक मन दिस सलाह

अंजोर.रायपुर, 10 जून 2021। प्रदेश के संस्कृति मंत्री अमरजीत भगत के अध्यक्षता म उंकर निवास म छत्तीसगढ़ फिल्म निर्माण नीति ले जुरे वर्चुअल बइठक के आयोजन करे गे रिहिस। प्रदेश म फिल्म बनाये ल प्रोत्साहित करे खातिर नीतिगत मामला म गोठबात बर आयोजित ए जरूरी बइठका म सचिव संस्कृति, अन्बलगन पी., संचालक विवेक आचार्य अउ राज्य योजना आयोग के सदस्य अउ सलाहकार गौरव द्विवेदी, संस्कृति अउ आन विभाग के अधिकारीगण सहित छत्तीसगढ़ सिने जगत के कलाकार, निर्माता अउ निर्देशक सामिल होइस। 

मिले आरो के मुताबिक संस्कृति मंत्री ह बइठक म किहिन के छत्तीसगढ़ म फिल्म निर्माण अउ इहां के कला संस्कृति ल नवा दिश दे के खातिर सबो प्रक्रियागत औपचारिकता ल पूरा करे जात हावय जेकर ले छत्तीसगढ़ी फिल्म नीति ल आखरी रूप दे जा सके। गौरव द्विवेदी ह छत्तीसगढ़ के सिनेमा क्षेत्र ल आर्थिक रूप संपन्न करे के दिश म बुता करे अउ ए क्षेत्र के लोगन ल राष्ट्रीय अउ अंतर्राष्ट्रीय स्तर म बुता करे खातिर प्रोत्सहित करे जाये के सुझाव दीस। संस्कृति सचिव अन्बलगन पी. ह फिल्म नीति के प्रस्तावित प्रमुख बिन्दु सहित आन बिन्दु म सुझाव आमंत्रित करिन। 

विवेक आचार्य संचालक संस्कृति अउ पुरातत्त्व ह किहिन के हिन्दी, छत्तीसगढ़ी अउ आन राज्य के फिल्म के खातिर मदद अनुदान के प्रावधान रइही। नवा  सिनेमाघर स्थापित करे के खातिर अउ जुन्ना सिनेमाघर के पुर्नद्धार बर आर्थिक मदद के प्रावधान करे जाही। फिल्म अवार्ड अउ ट्रेनिग संस्थान स्थापित करे के भी प्रावधान करे गे हावय। प्रदेश के संस्कृति अउ विरासत म आधारित फिल्म, राष्ट्रीय फिल्म म चयनित आंचलिक कलाकार मन खातिर शासन डहर ले मदद अनुदान के प्रावधान रइही। 

ये मउका म सतीश जैन, मनोज वर्मा, पुष्पेन्द्र, योगेश अग्रवाल, अनुज शर्मा,  राजेश अवस्थी, अजय सहाय, अनुमोद राजवैद्य, अमन हुसैन अउ गुलाम हैदर सहित केऊ निर्देशक मन ह फिल्म निर्माण बर संसाधन के विकास, टैक्स, टाकिज, सेटेलाइट चैनल, कलाकार अउ टेक्निशियन के खातिर पेंशन, बीमा, ग्रामीण क्षेत्र म टूरिंग टाकिज, फिल्म सिटी, फिल्म फेस्टिवल, वर्कशाप/सेमीनार/अवार्ड फंक्शन आदि प्रमुख बिन्दु म सुझाव दिस।