शिक्षक परिवार के आश्रित मनला अनुकम्पा नियुक्ति मिले ले मुख्यमंत्री के आभार मानिस छत्तीसगढ़ प्रदेश संयुक्त शिक्षक संघ

अंजोर.रायपुर, 8 जून 2021। मुख्यमंत्री भूपेश बघेल ले बिते दिन उंकर निवास कार्यालय म उद्योग मंत्री कवासी लखमा, छत्तीसगढ़ खनिज विकास निगम के अध्यक्ष गिरीश देवांगन के मौजूदगी म छत्तीसगढ़ प्रदेश संयुक्त शिक्षक संघ के प्रतिनिधि मंडल ह सौजन्य मुलाकात करिस। शिक्षक संघ के पदाधिकारी मन ह अनुकम्पा नियुक्ति के मामला म 10 प्रतिशत के सीमा-बंधन ल शिथिल करके शिक्षक मन के आश्रित के नियुक्ति दे म मुख्यमंत्री भूपेश बघेल के आभार जतायइस। छत्तीसगढ़ प्रदेश संयुक्त शिक्षक संघ ह लंबित अनुकम्पा नियुक्ति के प्रकरण ल कोरोना संकट काल के बखत नियम बंधन म छूट देके निराकृत करे जाये के मुख्यमंत्री भूपेश बघेल के मानवीय संवेदनायुक्त पहल बर संघ के तनि ले आभार चिट्ठी भेंट करत कृतज्ञता ज्ञापित करिस। 

जानबा होवय के मुख्यमंत्री भूपेश बघेल के अध्यक्षता म 18 मई के आयोजित केबिनेट के बइठक म अनुकम्पा नियुक्ति के पद के खातिर 10 प्रतिशत के बंधन ल खतम करत लंबित प्रकरण अउ कोरोना ले दिवंगत शिक्षक अउ शासकीय कर्मचारी मन के आश्रित ल अनुकम्पा नियुक्ति दे जाये के बखत 31 मई तक शिथिल करे के फइसला ले रिहिस। छत्तीसगढ़ शासन के ए फइसला के ओढ़र म सिर्फ शिक्षा विभाग के ले सहायक ग्रेड-03 अउ चतुर्थ वर्ग के 700 ले जादा पद म अनुकम्पा नियुक्ति दे जा चुके हावय। छत्तीसगढ़ प्रदेश संयुक्त शिक्षक संघ ह छत्तीसगढ़ सरकार के ए संवेदनशील पहल के दिवंगत शासकीय कर्मी अउ शिक्षक मन के प्रति सच्चा श्रद्धांजलि किहिन हावय। ए मउका म संघ के प्रांताध्यक्ष केदार जैन, ओम प्रकाश बघेल, ताराचंद जायसवाल, विजय राव, संतोष तांडे, कौशल नेताम सहित आन पदाधिकारी उपस्थित रिहिस।