अंजोर.रायपुर, 12 जून 2021। मुख्यमंत्री भूपेश बघेल ह अपन निवास कार्यालय म आयोजित वर्चुअल कार्यक्रम म मुंगेली अउ बेमेतरा जिला म 448 करोड़ 77 लाख रूपिया के लागत वाला विकास अउ निर्माण बुता के लोकार्पण-भूमिपूजन करिन, जेमा मुंगेली जिला म 276 करोड़ 12 लाख रूपिया के लागत के विकास बुता अउ बेमेतरा जिला म 172 करोड़ 65 लाख रूपिया के लागत वाला विकास अउ निर्माण बुता शामिल हावयं। मुख्यमंत्री भूपेश बघेल ह ए मउका म दुनों जिला के निवासी मनला बधाई अउ शुभकामना देवत किहिन किहिन के हमन जेन नवा छत्तीसगढ़ के गढ़े के संकल्प ले रेहेन, वो ह आज साकार होत हावय। सुराजी गांव के कल्पना, आकार ले लगे हावय। मुख्यमंत्री भूपेश बघेल ह ए मउका म कृषि अउ जल संसाधन मंत्री रविन्द्र चौबे के गेलौली म साजा म 50 बिस्तर वाला मातृ शिशु अस्पताल (एमसीएच) खोले के घोषणा करिस।
ए मउका म स्वास्थ्य मंत्री टी.एस. सिंहदेव, जल संसाधन मंत्री रविन्द्र चौबे, महिला अउ बाल विकास मंत्री श्रीमती अनिला भेंडि़या ह मुख्यमंत्री भूपेश बघेल के नेतृत्व म राज्य के समग्र विकास के खातिर करे जात प्रयास के सराहना करिन। ओमन किहिन के किसान, ग्रामीण, वनवासी, महिला मन के बेहतरी के खातिर मुख्यमंत्री ह जेन योजना अउ कार्यक्रम ल लागू करे हावय, उंकर जनमानस डहर ले बढ़ई करे जात हावय। राजीव गांधी किसान न्याय योजना के माध्यम ले किसान मन के देश म सबले जादा मदद पहुंचाये वाला राज्य छत्तीसगढ़ हावय। किसान मन अउ गांव वाला के ललक अउ उंकर चेहरा के चमक बतात हावय के छत्तीसगढ़ सरकार के योजना मन के लाभ ओला मिलत हावय। राज्य म खेती-किसानी अउ खुशहाली के एक नया दौर शुरू होइस हावय। कार्यक्रम के संसदीय सचिव गुरू दयाल सिंह बंजारे, सांसद अरूण साव, विधायक सर्वश्री अशीष छाबड़ा, धरमजीत सिंह, पुन्नू लाल मोहले ह भी वर्चुअल रूप ले सम्बोधित करिन।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।