बिलासपुर, गरियाबंद जिला प्रभारी मंत्री साहू ह बइठक म मितानिन ल तको पल्स ऑक्सीमीटर देके दिस सुझाव

अंजोर.रायपुर, 18 मई 2021। बिलासपुर अउ गरियाबंद जिला के प्रभारी मंत्री ताम्रध्व.ज साहू ह वर्चुअल बइठका म जिला प्रशासन अउ पुलिस प्रशासन के वरिष्ठ अधिकारी मन ले सोज जुड़ के कोरोना महामारी ले निपटे खातिर स्वास्थ्य सुविधा के विस्तार ले समीक्षा करिन। ये बइठक म जिला मुख्यालय अउ अनुभाग मुख्यालय के संग ही प्राथमिक स्वास्थ्य केंद्र स्तर म भी ऑक्सीजन कंसंट्रेटर के बेवस्था सुनिश्चित करे के निर्देश देत अउ मितानिन मनला दवई किट के संग पल्स ऑक्सीमीटर उपलब्ध कराये के सुझाव दिस ताकि लोगन के ऑक्सीजन स्तर के जांच सरलग रूप ले होत रिहि। 

संक्रमण के जादा संभावना वाला क्षेत्र ल चिन्हित करके, जरूरी दवाइ, इंजेक्शन अउ एम्बुलेंस के पर्याप्त बेवस्था करे अउ डॉक्टर्स, विशेषज्ञ अउ चिकित्सकीय स्टॉफ़ ल प्रशिक्षण दे के भी निर्देश दिय। तीसरा लहर के अनुमान ल देखत शिशु रोग विशेषज्ञ ले सलाह करके रणनीति तइयार करे अउ निजी अस्पताल मन अउ मेडिकल दुकान के सतत निगरानी करे अउ उंकर डहर ले मरीज़ मनके इलाज के खातिर जादा रकम वसूले अउ दवई मनके कालाबाजारी म सख्त कार्यवाही करे के निर्देश दिस।

सबो जिला अधिकारी मन के पोस्ट कोविड प्रभावित मन के इलाज अउ काउंसिलिंग के खातिर पोस्ट कोविड सेल बनाये अउ उहां फोन के बेवस्था करे ल किहिन हावय। कोरोना संक्रमण के रोकथाम के खातिर कोविड-19 प्रोटोकॉल के कड़ाई ले पालन कराये अउ गांव पंचायत स्तर म मूलभूत सुविधा मुहैया कराये के निर्देश दिस। वर्चुअल बइठक म दुनों जिला के कलेक्टर, पुलिस अधीक्षक,  मुख्य चिकित्सा अउ स्वास्थ्य अधिकारी सहित आने-आने विभाग के वरिष्ठ अधिकारी उपस्थित रिहिस।