अंजोर.सूरजपुर, 25 मई 2021। नशीली दवई के जरिये युवा पीढ़ी ल बर्बाद करे के कोशिश करइया एक आरोपी ल सूरजपुर पुलिस ह गिरफ्तार करे हावय। पुलिस अधीक्षक के निर्देश म नशा के काला कारोबार करइया लोगन के विरूद्व पुलिस के ये अभियान सरलग जारी रइही। थाना प्रभारी सूरजपुर के मुखबीर ले सूचना मिलिस के मस्जिद मोहल्ला सूरजपुर के सुहैल खान सरनापारा बाईपास रोड़ के पास खड़ा होके नशीली कफ सिरप बिक्री करे बर ग्राहक के तलाश करत हावय, सूचना ले पुलिस अधीक्षक सूरजपुर राजेश कुकरेजा ल अवगत कराए जाये म ओमन थाना प्रभारी ल सतर्कता बरतत घेराबंदी लगाके पकड़े के निर्देश दिस।
थाना सूरजपुर के पुलिस टीम सरनापारा बाईपास रोड़ म जइसे ही पहुंचिस वइसने ही सुहैल पुलिस ल देखके भागे लगे जेला घेराबंदी करके पकड़े गिस। ओकर कब्जा ले फेन्सीरेक्स कफ सिरप 100 नग अउ विनसिरेक्स कफ सिरप 80 नग कुल 180 नग नशीली कफ सिरप जप्त करे गे हावय जेकर बाजार म कीमत 96 हजार रूपिया हावय। प्रकरण म अपराध क्रमांक 245/21 धारा 21सी एनडीपीएस एक्ट के तहत् कार्यवाही करत आरोपी सुहैल खान पिता मोहम्मद अशराफल खान उमर 20 साल निवासी मस्जिद मोहल्ला सूरजपुर के विधिवत् गिरफ्तार करे गिस। मिले आरो के मुताबिक ए कार्यवाही म थाना प्रभारी सूरजपुर धर्मानंद शुक्ला, एसआई रश्मि सिंह, एएसआई गजपति मिर्रे, प्रधान आरक्षक अदीप प्रताप सिंह, तालिब खान, आरक्षक रामकुमार नायक अउ लक्ष्मी नारायण मिर्रे के अहम भूमिका रिहिस।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।