सिलगेर गांव म घटना के जिम्मेदार कोन? होही अब दण्डाधिकारी जांच

अंजोर.सुकमा, 25 मई 2021। बस्तर अंचल धरती पाछू केऊ बछर ले अपने बियाय बेटा के लहु ले लाल होवत हावय। कभू नक्सली, त कभू पुलिस के जवान मन म बस्तरिहा मनके छाती म गोली दागत हावय। पै उघरथे फेर कोनो ठोस कार्रवाई नी होए के सेती बने नीत नियाव के गोठ सुरू होती ही फदक जथे। अभी तातेतात बस्तर के सिलगेर गांव के घटना ल देखव उहां केंप के विरोध करत स्थानीय ग्रामीण मनके पुलिस संग झड़प म तीन झिन गांव वाले मनके मउत होगे। 

गांव वाले मनके मउत के बाद लोगन मन लाश ल लेके आंदोलन करिन, फेर प्रशासन कोनो ठोस फइसला नइ करे सकिस। अब आरो मिले हावय के कलेक्टर अउ जिला दण्डाधिकारी सुकमा विनीत नन्दनवार ह 17 मई के थाना जगरगुण्डा अन्तर्गत सिलगेर म होए घटना के जांच के खातिर डिप्टी कलेक्टर रुपेन्द्र पटेल के जांच दण्डाधिकारी नियुक्त करे हावय।

डिप्टी कलेक्टर अउ कार्यपालिक दण्डाधिकारी रुपेन्द्र पटेल के बताती ए घटना के संबंध म लिखित या मौखिक साक्ष्य 8 जून तक अवकाश के दिन ल छोड़के कोनो भी दिन कार्यालयीन समय म बिहनिया 11 बजे ले संझा 5 बजे तक कार्यालय डिप्टी कलेक्टर रुपेन्द्र पटेल, संयुक्त जिला कार्यालय सुकमा म स्वयं या अधिवक्ता के माध्यम ले या पोस्ट ले प्रस्तुत कर सकत हावय।

येकर पहिली ही प्रदेश के भारतीय जनता पार्टी ह तको जांच कमेटी बनाये हावय। जेन वो ह घटनास्थल अउ मृतक मनके परिजन ले भेंट करके सत्य के जांच करही अउ 7 दिन म संगठन ल जांच रिपोर्ट सौंपही। बीजेपी जांच टीम 6 हावय जेमा दिनेश कश्यप, महेश गागड़ा, किरणदेव, लता उसेंडी, सुभाउ कश्यप अउ राजा राम तोड़ेम। अब येतो जांच के बाद ही फरही-फरकत हो पाही के फायरिंग म तीन गांव वाला के मउत के जिम्मेदार कोन हावय, का दोषी मनला सजा मिलही, का उहां ले पुलिस कैम्प हटाये जाही ?