मंत्री डॉ.शिवकुमार डहरिया एक महीना के वेतन 1 लाख 30 हजार रूपिया जमा करिन मुख्यमंत्री मदद कोष म

अंजोर.रायपुर, 7 मई 2021। कोरोना वायरस कोविड-19 के महामारी ले रोकथाम के खातिर नगरीय प्रशासन अउ विकास अउ श्रम मंत्री डॉ. शिवकुमार डहरिया ह आज अपन एक महीना के वेतन मुख्यमंत्री मदद कोष म जमा कराइन। मिले आरो के मुताबिक आज मंत्रालय के स्टेट बैंक शाखा म ओमन अपन वेतन के रकम 1 लाख 30 हजार रूपिया जमा करिन हावय। ए बखत मंत्री डॉ.डहरिया ह किहिन हावय के कोरोना संक्रमण ले देश अउ हमर राज्य प्रभावित हावय। 

मुख्यमंत्री के नेतृत्व म प्रदेश म कोरोना ले निपटे के पूरा कोशिश करे जात हावय अउ पाछु कुछ दिन ले कम होत संख्या ले सम्भावना हावय के आने वाला दिन म अउ राहत मिलही। ओमन किहिन के कोविड ले निपटे खातिर आर्थिक ही नइ सबो किसम के सहयोग के जरूरत हावय। पाछु साल बहुत ले लोगन ह मुख्यमंत्री राहत कोष म यथासंभव अपन सहयोग प्रदान करे रिहिस। ए साल भी ए आपदा ले निपटे के खातिर सबके सामिलहा सहयोग के जरुरत हावय। इही सेती महु अपन एक महीना के वेतन मुख्यमंत्री मदद कोष म समर्पित करे हावय। ओमन आम जनता ले भी अपील करिन हावय के घर म राहव अउ शासन के नियम के धैर्यपूर्वक पालन करें। ओमन गेलौली करे हावय के जरूरतमंद के मदद के खातिर आगू आएं अउ यथासम्भव मुख्यमंत्री मदद कोष म सहयोग रकम जमा करके अपन योगदान देंवे। येकर ले जरूरतमंद के मदद करे म आसानी होही।