अंजोर.राजनांदगांव, 18 मई 2021। कोरोना महामारी के रोकथाम के खातिर शासकीय मेडिकल कॉलेज पेण्ड्री राजनांदगांव म वीआरडीएल (वायरल रिसर्च एण्ड डायग्नोस्टिक लैब्रोटरी) लैब ह पूरा समर्पण भाव के संग काम करत उपलब्ध संसाधन के बीच कोविड-19 के 2 लाख 75 हजार सैम्पल के जांच पूरा कर लीस हावय। ये उपलब्धि लैब ह मात्र 9 महीना म हासिल करे हावय। कोविड लैब 7 अगस्त 2020 ले सरलग कार्यरत हावय।
वीआरडीएल लैब म काम करत लैब इन्चार्ज डॉ. सिध्दार्थ पिंपलकर ह बताइन के लैब म कार्यरत अधिकारी, वैज्ञानिक, टेक्निशियन, लैब सहायक अउ डाटा एन्ट्री आपरेटर के अथक परिश्रम अउ समर्पण ले ये बुता संभव हो सके हावय। लैब के काम सुचारू रूप ले चले म डॉ. विजय अंबादे, डॉ. सुरेंदर कौर, इ. नवा अउ नेहा कुमारी के विशेष योगदान रिहिन। शासकीय भारत रत्न स्वर्गीय अटल बिहारी वाजपेयी स्मृति मेडिकल महाविद्यालय पेण्ड्री राजनांदगांव के अधिष्ठाता डॉ. रेणुका गहिने ह ए उपलब्धि के खातिर विभाग के अधिकारी मन अउ कर्मचारी मन ल बधाई देते होए उंकर उत्साहवर्धन करे हावय।
लैब इंचार्ज डॉ. सिध्दार्थ ह बताइन के वीआरडीएल लैब शुरू होए ले अब तक सबो अधिकारी मन ह बिना कोनो अवकाश के सरलग बुता करे हावय। ये सबो स्टाफ के योगदान ले सम्भव हो पाये हावय। कोरोना महामारी के ए कठिन घड़ी म वायरोलॉजी लैब के सबो स्टाफ ह एक दूसर के संग देत सरलग बुता करे हावय। संसाधन के सरलग पूर्ति होत रही त लैब इही रकम ले आगू भी पूरा समर्पित भाव ले बुता करे के खातिर सदा तत्पर हावय। अभी राजनांदगांव के वीआरडीएल लैब म राजनांदगांव, बालोद, बेमेतरा अउ कबीरधाम ले आने वाला कोविड-19 आरटीपीसीआर सैंपल के जांच करे जात हावय। येकर अलावा भी समय-समय म राज्य के जरूरत के मुताबिक आन जगह के सैम्पल के भी इहां जांच करे गे हावय। लैब इंचार्ज डॉ. सिध्दार्थ पिंपलकर ह ए उपलब्धि के बर लैब म कार्यरत सबो सहकर्मी के आभार व्यक्त करे हावय।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।