अंजोर.रायगढ़, 8 मई 2021। पुलिस अधीक्षक के मार्गदर्शन म जिला पुलिस लॉकडाउन ल सख्ती ले पालन कराये म लगे हावय अउ ए बीच घटित अपराधिक घटना के आरोपी मन के जेल भेजई तको सरलग चलते हावय। मिले आरो के मुताबिक कोतरारोड रेलवे क्रॉसिंग के तिर ट्रेलर के ड्राइवर दीप रंजन कुमार मेहता ले मोटरसाइकिल CG 13 AE-3356 म सवार तीन अज्ञात आरोपी 20,000 उंकर कपड़स, आधार कारड डीजल कारड जेन ट्रेलर केबिन म रिहिस ओला लूटके भाग गे। जेमर कोतवाली थाना ह रिपोर्ट के आधार म तुरते तीन आरोपी नरेश साहू, मुकेश मैत्री, विश्वनाथ चौहान निवासी दीनदयाल कालोनी रायगढ़ ल हिरासत म लिस। आरोपी मन ले घटना म प्रयुक्त बाइक अउ ड्रायवर ले लूटे रकम 4,000 अउ ड्रायवर के कपड़ा ल जप्त करे गिस।
थाना प्रभारी अउ स्टाफ डहर ले आरोपी मन ले अलग-अलग पूछताछ करे म आरोपी नरेश साहू अउ विश्वनाथ चौहान फ्लिपकार्ट कंपनी के डिलीवरी ब्वॉय ले बड़े रामपुर के पास नकदी रकम 80,000 के लूटपाट कबूल करे हावय। साथ ही शहर के बीचों-बीच सुभाष चौंक, विशाल बुटिक के पास एक महिला के डिक्की ले रूपिया के उठाईगिरी के खुलासा होए हावय। अइसने दीनदयाल कालोनी रायगढ़ म लूट ल कबूल करे हावय, जेमा मिले 2 लाख 40 हजार रूपिया म बांचे बचे 15,000 नगद रूपिया विवेचक डहर ले बरामद करे गे हावय।
ए रकम तीनों आरोपी नरेश साहू उर्फ पूर्णाचंद पिता स्व. ईश्वर लाल 24 साल, विश्वनाथ चौहान पिता स्व. बुधराम चौहान 26 साल अउ मुकेश मैत्री पिता गरूण मैत्री 26 साल तीनों निवासी वार्ड क्रमांक 06 दीन दयाल कालोनी रायगढ़ ल दू लूट अउ उठाईगिरी के अपराध म गिरफ्तार करे गे हावय। आरोपी मन के मामला म नकदी रकम 22,000 रूपिया के जप्ती तको करे गे हावय।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।