अंजोर.धमतरी, 8 मई 2021। धमतरी जिला के भखारा सामुदायिक स्वास्थ्य केन्द्र भी अब कोविड केयर सेंटर के रूप म बुता करही। इहां 7 मई ले शुरू होए ये केंद्र ले भखारा सहित आस-पास के गांव कोर्रा, जी-जामगांव, कचना आदि के कोरोना मरीज मन ल स्वास्थ्य सुविधा मिलही। मुख्य चिकित्सा अउ स्वास्थ्य अधिकारी डॉ. डी.के.तुर्रे के बताती ए केंद्र म पूरा प्रशिक्षित चिकित्सक, फार्मासिस्ट, स्टाफ नर्स अउ पैरामेडिकल स्टाफ 24×7 सेवा देही।
ओमन भखारा अउ आसपास के लोगन ले अपील करे हावय के कोविड पॉजिटिव जरुरतमंद मरीज मनला ए केंद्र के शुरू होए के जानकारी देवे अउ जरूरत पड़े म प्रभारी चिकित्सा अधिकारी कोविड केयर सेंटर भखारा डॉ. श्रवण देवांगन, मो. नंबर 78281-06497, प्रभारी गवई चिकित्सा सहायक गौरव बंगानी मो. नंबर 98264-95757 अउ चिकित्सा अधिकारी अउ जिला कोविड-19 रोकथाम अधिकारी डॉ. विजय फूलमाली मो. नंबर 98939-50640 ले सम्पर्क करे जा सकत हावय।
जानबा होवय के इहां 50 सेन्ट्रलाईज ऑक्सीजनयुक्त बिस्तर के बेवस्था करे गे हावय। स्वास्थ्य विभाग डहर ले 40 नग जंबो ऑक्सीजन सिलेण्डर, जेकर क्षमता 47.20 लीटर हावय, के आपूर्ति भी करे गे हावय। कलेक्टर जय प्रकाश मौर्य के मार्गदर्शन अउ दान-दाता मनके सहयोग ले सामुदायिक स्वास्थ्य केन्द्र भखारा ल कोविड केयर सेंटर के रूप म विकसित करे गे हावय। बताया गे हावय के इहां भरती मरीज मन के खाने के बेवस्था स्थानीय दान-दाता मन डहर ले करे जाही।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।