अंजोर.रायपुर, 29 मई 2021। खनिज अधिकारी मन के टीम राज्य के अलग-अलग हिस्सा म लौह अयस्क के परिवहन म रॉयल्टी पर्ची के दुरुपयोग, ओवरलोडिंग, लम्पस फाइन अउ आन मामला के जांच अउ ताबड़तोड़ कार्रवाई म जुटे रिहिस। खनिज अधिकारी मन के टीम ह लौह अयस्क परिवहन म लगे 105 गाड़ी के जांच करे हावय, जेमा ले 11 गाड़ी ल जब्त करके संबंधित इलाका के थाना के सुपुर्द कर दे गे हावय। मिले आरो के मुताबिक जांच के बखत बालोद जिला म भिलाई स्टील प्लांट के आवंटित खदान के लम्पस फाइन के जानकारी नइ मिले के मामला म बीएसपी ल नोटिस जारी करे गे हावय।
खनिज विभाग के बताती राज्य के कांकेर, राजनांदगांव, बालोद, जगदलपुर, दंतेवाड़ा अउ रायपुर के डहर ले आने-आने ठऊर मन म प्रदेश स्तर के खनिज अधिकारी मन के दल ह लौह अयस्क परिवहन म रायल्टी पर्ची के दुरूपयोग, ओवरलोड, लम्पस अउ फाईन के जांच अउ खनिज के ग्रेड (रासायनिक विश्लेषण) के जांच करिन। संयुक्त संचालक केन्द्रीय उड़नदस्ता के नेतृत्व म आने-आने जिला के खनिज अधिकारी मन के दल ह सघन जांच करे हावय। ए दल म लौह अयस्क के ग्रेड के जांच बर क्षेत्रीय कार्यालय बिलासपुर, जदगलपुर अउ रायपुर के जियोलॉजिस्ट ल भी शामिल करे रिहिन। टीम ह भानुप्रतापपुर क्षेत्र म 31 वाहन, चारामा क्षेत्र ले 9, जगदलपुर ले 10, रायपुर धमतरी रोड़ म 14, सिलतरा रायपुर क्षेत्र ले 5 अउ राजनांदगांव जिला म 7 ए रकम ले कुल 74 वाहन ल सेम्पल ले हावय जेला जांच के खातिर केन्द्रीय प्रयोगशाला रायपुर भेजा गे हावय। खनिज अधिकारी मन के टीम ह दंतेवाड़ा के एनएमडीसी ले परिवहन करत 30 वाहन अउ जगदलपुर रेल्वे साईडिंग क्षेत्र म 6 वाहन के जांच भी करिन। एनएमडीसी बचेली क्षेत्र म एनएमडीसी डहर ले तौल कराये गे मात्रा अउ रेल्वे बैगन ले परिवहन करके मात्रा के क्रास चेकिंग के कार्यवाही अभी जारी हावय।
कांकेर जिला म स्वीकृत आने-आने निजी कंपनी के लौह अयस्क परिवहन के 70 वाहन के जांच करे गिस। जेमे ले 07 वाहन के ओवरलोड, लम्पस फाईन म भिन्नता अउ खनिज के ग्रेड म अन्तर होए के शंका के चलत जब्त करके पुलिस के सुपुर्दगी म दे दे गे हावय। बालोद जिला म भिलाई स्टील प्लांट के स्वीकृत खदान म लम्पस फाईन ले संबंधित जानकारी प्रस्तुत करे बर नोटिस जारी करे गिस। रायपुर जिला के सिलतरा अउ उरला क्षेत्र म आने-आने संयंत्र ल प्रदाय करे जात लौह अयस्क के जांच म 04 वाहन ल जब्त करके जांच बर उरला थाना के सुपुर्द कर दे गे हावय। ए रकम ले अब तक कुल 105 वाहन के जांच करे गिस हावय, जेमा ले कुल 11 वाहनो के जब्ती के कार्रवाई करे गिस हावय। खनिज अधिकारी मनके टीम अभी भी जांच-पड़ताल म जुटे हावय।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।