बोड़ला नगर पंचायत म आबादी भूमि के पट्टा वितरण के समीक्षा करिस वन मंत्री

अंजोर.कबीरधाम, 29 मई 2021। प्रदेश के वन, पर्यावरण अउ परिवहन मंत्री मोहम्मद अकबर ह आज वीडियो कॉन्फ्रेंसिंग के माध्यम ले कबीरधाम जिला के नगर पंचायत बोड़ला म निवासरत लोगन ल आवासीय भूमि के पट्टा दे के बुता के संबंध म विस्तार ले जानकारी लिस। ओमन सर्वे के मुताबिक पंचायत के वार्ड म रहइया सबो पात्र हितग्राही मन ल तत्परता ले पट्टा वितरण के कार्रवाई सुनिश्चित करे के निर्देश दिस। 

वन मंत्री मोहम्मद अकबर ह नगर पंचायत के वार्ड म धास भूमि, सुरक्षित आबादी, घोषित आबादी, प्रचलित आबादी, निजी भूमि, रद्दा अउ तालाब अउ जंगल भूमि ल छोड़के बांचे भूमि म पात्र हितग्राही मन ल आवासी भूमि के पट्टा दे के कार्यवाही लउहा ले पूरा करे के निर्देश क्षेत्र के एस.डी.एम., सी.एम.ओ. नगर पालिका ल दिस। ए बखत नगर पंचायत अध्यक्ष, वार्ड के पार्षद अउ एल्डरमेन ले उंकर वार्ड के लोगन ल आवासीय भूमि के पट्टा दे जाये के संबंध म गोठबात भी करिन।