अंजोर.कवर्धा, 26 मई 2021। वैश्विक महामारी कोरोना के रोकथाम के खातिर लगे लॉकडाउन म महात्मा गांधी राष्ट्रीय ग्रामीण रोजगार गारंटी योजना गवई क्षेत्र के खातिर संजीवनी बन गे हावय। गांव वाला ल अपन गांव म ही रोजगार के मउका मिल सके येकर खातिर कबीरधाम जिला प्रशासन डहर ले सरी बेवस्था करत बड़े पैमाना म योजना ले बुता स्वीकृत करे गिस जेकर परिणाम हावय के आज कबीरधाम जिला गांव वाला ल रोजगार दे के मामला म राज्य म दूसरा नंबर म हावय। जिला के चारों विकास खंडों ल मिलाके 165000 ले जादा मजदूर मन ल रोजगार के मउका औसतन रोज मिले हावय।
मिले जानकारी के मुताबिक जनपद पंचायत बोड़ला म 46915, जनपद पंचायत कवर्धा म 35628, जनपद पंचायत पंडरिया म 42169 अउ जनपद पंचायत सहसपुर लोहारा म 40452 पंजीकृत मजदूर मन के आज के स्थिति म रोजगार मिले हावय। जिला के 468 गांव मन म आने-आने बुता चलतेच हावयं जेमा तालाब गहरीकरण कार्य, नया तालाब निर्माण कार्य, मिट्टी सड़क निर्माण कार्य, डबरी निर्माण कार्य, कच्ची नाली निर्माण के संग सुराजी गांव योजना ले कराए जाये वाला नरवा के जेवियन स्ट्रक्चर निर्माण, छोटे चेक डैम निर्माण, लूज़ बोल्डर चेक डैम, गाद निकासी जइसे आन बुता करे जात हावयं। आने-आने गांव मन म 409 बुता चलत हावयं अउ ये बुता म पंजीकृत मजदूर मन ल सरलग रोजगार के मउका मिलत हावय संग ही समय म मजदूरी भुगतान हो जाये ले गांव वाला ल लॉकडाउन के बखत आर्थिक परेशानी ले बच गिन हावय। पाछू साल कस ए साल भी कबीरधाम जिला म गांव वाला ल जादा ले जादा रोजगार दे के सिलसिला सरलग जारी हावय। इही सेती राज्य के 27 जिला म राजनांदगांव के बाद सबले जादा रोजगार कबीरधाम के गांव वाला ल मिले हावय।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।