अंजोर.रायपुर, 29 मई 2021। ए बार अंतर्राष्ट्रीय योग दिवस म देश-विदेश म आयोजित समारोह म छत्तीसगढ़ के हर्बल उत्पाद के धूम रइही। ये प्रतिष्ठित समारोह के प्रतिभागी मनके गिफ्ट हावयम्पर के रूप म राज्य म तइयार अउ डिजाइन्ड ‘कोविड कवच‘ भेंट करे जाही। एला एक इम्यूनिटी बूस्टर के रूप म हर्बल उत्पाद ले डिजाइन्ड करे गे हावय। ए खास गिफ्ट हैम्पर के मुख्यमंत्री भूपेश बघेल ह आज अपन निवास कार्यालय म लांच करिन।
जानबा होवय के आने-आने भारतीय दूतावास अउ ट्रायफेड इंडिया के बीच होए एक समझौता के तहत 21 जून के अंतरराष्ट्रीय योग दिवस समारोह म भाग लेत प्रतिभागी मनला उपहार हर्बल उत्पाद गिफ्ट करे जाये हावय। येकर खातिर ट्राइफेड इंडिया ह छत्तीसगढ़ के हर्बल उत्पाद के चयन करे हावय। समारोह म भेंट करे जाये वाला गिफ्ट हैम्पर म आर्गेनिक बस्तर काजू, वाइल्ड फारेस्ट हनी, ग्रीन टी, आंवला कैंडी, इमली कैंडी, आंवला पाचक, चिरौंजी दाना अउ आने-आने प्राकृतिक अव्यव ले बने हर्बल साबुन अउ फेस पैक शामिल हावयं।
मुख्यमंत्री श्री बघेल के नेतृत्व म राज्य सरकार ह लघु वनोपज के माध्यम ले वनवासी मनला नवा आर्थिक ताकत दे के खातिर नवा रणनीति के तहत काम शुरू करे हावय। छत्तीसगढ़ म समर्थन कीमत म खरीदे जाये वाला लघु वनोपज के संख्या 7 ले बढ़ाके अब 52 के जा चुके हावय। छत्तीसगढ़ लघु वनोपज संघ के माध्यम ले इंकर संग्रहण अउ वन-धन केन्द्र म प्रसंस्करण के काम करे जात हावय। प्रसंस्करण के बुता महिला स्व-सहायता समूह डहर ले करे जात हावय। येकर वितरण छत्तीसगढ़ हर्बल ब्रांड के नाम ले करे जात हावय। थोड़ा ही समय म अपन गुणवत्ता के सेती राज्य के ये हर्बल उत्पाद ह देशभर म पहचान बना लिस हावय। ये उत्पाद म छत्तीसगढ़ के जंगल के गुणवत्ता अउ शुद्धता रचे-बसे हावय।
ट्राइफेड इंडिया भारत सरकार के एक एजेंसी हावय, जेन जनजातीय कल्याण के खातिर उंकर डहर ले बने अउ उत्पादित वस्तु मनल प्रोत्साहित करे के काम करत हावय। अंतरराष्ट्रीय स्तर के गुणवत्ता वाला हर्बल उत्पाद के तलाश करत ट्राईफेड ह छत्तीसगढ़ के हर्बल उत्पाद ल उपहार स्वरूप भेंट के खातिर उपयुक्त पाये हावय। 21 जून के अंतरराष्ट्रीय योग दिवस म आयोजित होए वाला समारोह ल पूरा विश्व म प्रतिष्ठा मिले हावय। टेलीविजन म येकर प्रसारण पूरा दुनिया म करे जात हावय। छत्तीसगढ़ हर्बल गिफ्ट हैंपर्स योग के प्रति उत्साही लोगन ल न्यूयार्क, यूएसए म भारतीय दूतावास के कोति ले दे जाही। संग ही एमन ल नवा दिल्ली म भी आने-आने विदेशी दूतावास ल भेंट करे जाही। ट्रायफेड डहर ले करे गे ए पहल ले छत्तीसगढ़ के हर्बल उत्पाद ल सही मायने म अंतर्राष्ट्रीय दर्जा अउ मान्यता मिलही।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।