चैतवार अउ लुमती नाला के बहुरिस दिन, खेत के भुताही अब पियास... पढ़व कइसे होगे ये कायाकल्प

अंजोर.दुर्ग 25 मई 2021। जिला म खेती किसानी के अवसर ल बढ़ाये के खातिर नरवा योजना संजीवनी साबित होत हावय। जेन नाला के जीर्णोद्धार के खातिर ए योजना ले बुता होवत उहाँ भूमिगत जलस्तर म तेजी ले बड़वार होत हावय। आज कलेक्टर डॉ. सर्वेश्वर नरेंद्र भुरे ह दुर्ग ब्लाक के चैतवार नाला के सत्रह किमी के पैच के सघन निरीक्षण करिन। इहाँ नरवा योजना ले होए बुता ल ओमन देखिन अउ किसान मन ले गोठबात करिन। गांव चंदखुरी के सरपंच ह बताइन के नरवा योजना ले जमीन के पानी काफी ऊपर आ गे हावय। ए बार हमन ह रबी के फसल ले हावन। हर बार रबी तक पानी काफी नीचे चले जात रिहिस जेकर ले दूसइया फसल के कोनो गुंजाइश नइ बनत रिहिस।

इहाँ नाला के आसपास के किसान मन ह जलस्तर म बड़वार होए के अच्छा लाभ उठाया हावय अउ दूसरा फसल ले हावय। इहाँ अधिकारी मन ह बताइन के चंदखुरी म डिसेल्टिंग माने गाद निकाले के बुता करे गिस, संग ही लूज बोल्डर भी डाले गिस जेकर ले पानी ल रिचार्ज होए म काफी मदद मिलीस। जिला पंचायत सीईओ सच्चिदानंद आलोक ह बताइन के चैतवार नाला खुरसुल, बोरई, गनियारी अउ पीपरछेड़ी ले गुजरथे। येकर लंबाई सत्रह किमी हावय। एमे चंदखुरी म लूज बोल्डर के काम भी होइस हावय अउ डिसेल्टिंग के भी। आन गांव म डिसेल्टिंग के बुता समाप्ति तनि हावय। कलेक्टर ह आसपास के जलसंसाधन विभाग के संरचना भी देखींन। ओमन किहिन के मामूली मरम्मत ले अउ जीर्णोद्धार ले ये संरचना ठीक हो सकत हावयं। इंकर ठीक होए ले बड़े क्षेत्र म लाभ मिलही।

कलेक्टर ह किहिन के चैतवार नाला म होए बुता ले ए साल बड़े पैमाना म वाटर रिचार्ज होही अउ येकर ले बड़े क्षेत्र म कृषि के संभावनाएं बढ़ही। ओमन अधिकारी मन ले किहिन के राज्य सरकार डहर ले धान के बदला आन फसल मन ल प्रोत्साहित करे के योजना भी लाये हावयं। अब नरवा के माध्यम ले वाटर रिचार्ज होत हावय। अइसे इलाका म वैविध्य के बढि़या संभावना बनही। ए बखत दुर्ग सीईओ राजपूत अउ आन अधिकारी भी उपस्थित रिहिस।

अपर कलेक्टर ह देखा लुमती नाला

अपर कलेक्टर सुश्री ऋचा चौधरी ह भी आज धमधा ब्लाक म नरवा योजना ले होत बुता देखिन। लुमती नाला म डिसेल्टिंग के बुता ओमन पोटिया म देखिन। इहाँ किसान मन ह बताइन के लुमती नाला के गहरीकरण के चलत भूमिगत जल के स्तर काफी बढ़ गे अउ हर बार बोर सूख जात रिहिस फेर ए बार बोर नइ सूखे हावय अउ रबी फसल के खातिर अच्छा पानी मिलिस जेकर ले किसान सब्जी भाजी भी उगाये लगे हावयं। ए बखत एसडीएम बृजेश क्षत्रिय अउ सीईओ मेश्राम मौजूद रिहिस।

नरवा योजना इही सेती हावय काफी प्रभावी

नरवा योजना भूमिगत जल के स्तर बढ़ात हावय। एमे कई रकम ले लाभ हावयं। येकर खर्च काफी सीमित हावय काबर के डिसेल्टिंग जइसे बुता हावयं जेन मनरेगा जइसे योजना ले हो सकत हावयं। अइसे कोनो रकम के संरचना नइ बनाना हावयं जेन जादा जगह घेरत हावयं अउ जेला बनाये म काफी लागत आती हावय। ये न्यूनतम निवेश म अधिकतम लाभ के गारंटी जइसे योजना हावय काबर के भूमिगत जलस्तर बढ़ये ले किसान मन के बोरवेल पर्याप्त प्रभावी हो जात हावयं अउ एमन ल गर्म मौसम म भी संजीवनी मिल जात हावय।