गली-मोहल्ला म कोरोना जागरूकता के नारा लिखत हावय आंगनबाड़ी कार्यकर्ता अउ मितानिन

अंजोर.धमतरी, 12 मई 2021। कोविड-19 ले आमजनता म जागरूकता लाने खातिर जिला प्रशासन हरसंभव प्रयास करत हावय। जिला के मैदानी अमला भी कोरोना वायरस ल लेके जनचेतना लाने के दिशा म अलग-अलग गतिविधी अउ नवाचार संचालित करके अपन स्तर म प्रयास करत हावय। इही कड़ी म नगरी विकासखण्ड के गांव माकरदोना के आंगनबाड़ी कार्यकर्ता, मितानिन के संग मिलके दीवार लेखन के माध्यम ले लोगन ल जागरूक करे जा हावय। 

परियोजना अधिकारी महिला अउ बाल विकास नगरी ह बताइन के गांव माकरदोना अउ स्कूलपारा के आंगनबाड़ी कार्यकर्ता डहर ले टीकाकरण के प्रति गांव वाला म सकारात्मक सोच विकसित करे के खातिर वो स्वयं दीवार लेखन करत हावयं। दीवार लेखन के माध्यम ले न सिर्फ लोगन ल सरल शब्द म समझाये जात हावय, बल्कि लोगन ल कोविड के संक्रमण ले बचे के खातिर जरूरी उपाय के जानकारी भी दे जात हावय। येकर अलावा आंगनबाड़ी कार्यकर्ता अउ मितानिन गांव वाला के घर-घर जाके उंकर ले गृहभेंट करके मास्क के उपयोग करे, साबुन ले बार-बार हाथ धोये अउ जरूरी दूरी बनाए रखे की भी सलाह देत हावयं। 

ए काम म बाकायदा स्थानीय सरपंच, पंच सहित गांव के बुजुर्ग भी सहयोग करत हावयं। माकरदोना के आंगनबाड़ी कार्यकर्ता श्रीमती ममता नेताम अउ स्कूलपारा के कार्यकर्ता चंद्रिका नेताम ह बताइन के प्रचार-प्रसार के ये माध्यम के सकारात्मक परिणाम दिखत हावयं। ओमन किहिन के कोरोना वायरस के प्रति ग्रामीणजन सचेत होवत हावयं अउ टीकाकरण के खातिर आगू आत हावयं, संग ही शासन डहर ले जारी नियम-निर्देश के यथासंभव पालन करे के भी प्रयास गांव वाला के डहर ले करे जात हावय।