सिम्स म अगस्त 2020 ले अब तक 2 लाख कोरोना जांच, पाछू चारेच महीना म होगे 1 लाख

अंजोर.बिलासपुर, 12 मई 2021। कोरोना महामारी के रोकथाम के खातिर बिलासपुर स्थित सिम्स ह पूरा समर्पण भाव के संग काम करत कम संसाधन के बीच कोविड-19 के 2 लाख नमून के जांच पूरा कर ले हावय। एमे एक लाख टेस्ट बीते चार महीना म ही करे गे हावय। 

मुख्यमंत्री भूपेश बघेल के नेतृत्व म छत्तीसगढ़ सरकार डहर ले कोरोना महामारी के पहचान अउ रोकथाम के खातिर जांच म विशेष धियान दे जात हावय। राज्य म अभी के बेरा म रोज 60 हजार ले जादा टेस्ट करे जात हावय। राज्य म अभी के बेरा म राज्य के सबो प्राथमिक स्वास्थ्य केन्द्र स्तर तक रैपिड एंटीजन जांच सुविधा अउ 31 शासकीय लैब, 5 निजी लैब, म टू्रनॉट जांच सुविधा अउ 11 शासकीय लैब अउ 5 प्राइवेट लैब म आरटीपीसीआर के जांच सुविधा उपलब्ध हावय। 

सिम्स के माइक्रोबायोलॉजी विभाग के लैब म कोविड-19 के 2 लाख नमून के जांच 11 मई के पूरा कर ले गिस। एमे 17 हजार 704 पॉजिटिव अउ एक लाख 79 हजार 115 नेगेटिव रिपोर्ट शामिल हावयं। जानबा होवय के एक अगस्त 2020 ले सिम्स के माइक्रोबायोलॉजी विभाग म आरटीपीसीआर जांच शुरू करे रिहिस, तब ले लेके आज तक सीमित संसाधन अउ स्टाफ के संग सरलग बुता करत ये लक्ष्य हासिल करे गे हावय। शुरुआत 13 सैंपल ले करे गिस रिहिस। सिम्स लैब म अगस्त 2020 ले 21 जनवरी 2021 तक एक लाख सैंपल्स के जांच पूरा करे गे रिहिस। येकर बाद अगला एक लाख सैंपल बीते 4 महीना म करे गिस।

सिम्स के डॉक्टर मन ह बताइन के ये लैब म कार्यरत अधिकारी, वैज्ञानिक, तकनीशियन, लैब सहायक अउ डाटा ऑपरेटर के अथक परिश्रम अउ समर्पण ले संभव हो सकिस। संस्था के वायरोलॉजी लैब प्रभारी डॉ. रेखा बारापात्रे अउ विभाग प्रमुख डॉ. सागरिका प्रधान डहर ले सरलग प्रोत्साहित करे गिस। सिम्स के अधिष्ठाता डॉ. तृप्ति नगरिया ह ए उपलब्धि के खातिर विभाग के अधिकारी मन अउ कर्मचारी मन ल बधाई देते उंकर उत्साहवर्धन करिन। ए उपलब्धि म डॉ. ज्योत्सना दुबे, डॉ. अंजू श्रीवास्तव, डॉ. रश्मिका दवे, डॉ. विनोद टंडन अउ डॉ. प्रियंका पल्लवी के विशेष योगदान रिहिन। सिम्स ल अजीज प्रेम जी फाउंडेशन डहर ले एक आरटीपीसीआर मशीन अऊ दे गे हावय जेकर ले आने वाला दिन म कोविड जांच म अउ तेजी आही।