अंजोर.रायपुर, 6 मई 2021। मुख्यमंत्री दाऊ भूपेश बघेल ह किहिन के छत्तीसगढ़ देश के एक अइसे राज्य आए, जेन कोरोना संक्रमण के रोकथाम के खातिर मितानिन मनके माध्यम ले गांव-गांव म कोरोना लक्षण वाले मरीज मन के पहचान करके, ओला निशुल्क दवा उपलब्ध करात हावय। राज्य सरकार के ए प्रयास के सार्थक परिणाम भी मिलत हावय। राज्य म कोरोना के गंभीर मरीज मन के संख्या म कमी आये हावय अउ रिकवरी रेट भी बढ़ात हावय।
मुख्यमंत्री भूपेश बघेल आज वीडियो कॉन्फ्रेंसिंग के माध्यम ले बिलासपुर अउ सरगुजा संभाग के अनुविभागीय अधिकारी राजस्व अउ पुलिस सहित खंड चिकित्सा अधिकारी मन तहसीलदार अउ नायब तहसीलदार मनला संबोधित करत रिहिस। मुख्यमंत्री श्री बघेल ह किहिन के ओला ए बात के संतोष हावय के आप सब जिला, तहसील, ब्लॉक अउ गांव म कोरोना संक्रमण के रोकथाम के खातिर शासन के दिशा-निर्देश अउ अपन दायित्व के भली-भांति निर्वहन करे हावव। यही सेती कोरोना के गंभीर संक्रमण के स्थिति ले छत्तीसगढ़ राज्य धीरे-धीरे उभरे लगे हावय। ओमन किहिन के मानवता ल बचाये के ये लंबा लड़ाई हावय। हम सबला मिलके बिना रुके, बिना थके, योजनाबद्ध तरीका ले येकर ले लड़ना हावय।
मुख्यमंत्री ह आगू किहिन के स्थानीय स्तर म कोरोना के रोकथाम के खातिर हम का सावधानी बरते हावन? का उपाय करके रेहेन? ये जरूरी हावय। ओमन किहिन आन राज्य मनके तुलना म छत्तीसगढ़ राज्य म हॉस्पिटल, बेड, दवा, आईसीयू अउ आक्सीजन उक ल लेके स्थिति संतोषजनक हावय। राज्य स्तर ले लेके ब्लॉक अउ तहसील स्तर म स्थापित कोविड केयर सेंटर म ऑक्सीजन बेड के संख्या म सरलग वृद्धि करे जात हावय। मुख्यमंत्री ह किहिन के ग्रामीण अंचल म शादी- ब्याह के सेती ले संक्रमण बढ़त हावय। येकर रोकथाम के खातिर गांव, घर ले लेके सीमावर्ती इलाका म बाहिर ले आने वाला लोगन म सतत निगरानी के जरूरत हावय। येकर खातिर मितानिन, कोटवार, आंगनवाड़ी कार्यकर्ता, शिक्षक, पटवारी उक के मदद ले के बात किहिन। बाहर ले आने वाला के क्वॉरेंटाइन सेंटर म ठहराये अउ उंकर टेस्ट करे जाये के जरूरत हावय।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।