आर्डर ले कमती टीका के खुराक पठोवथे जबकि सीरम इंस्टीट्यूट ल अग्रिम भुगतान होहे : मुख्यमंत्री भूपेश बघेल

अंजोर.रायपुर, 7 मई 2021। छत्तीसगढ़ सरकार प्रदेश के 18 ले 44 उमर वर्ग के लोगन के फोकट म टीकाकरण के खातिर भारत बायोटेक ल कोवैक्सीन के खातिर अउ सीरम इंस्टीट्यूट ल कोविशील्ड वैक्सीन के खातिर आर्डर दे हावय। ये दुनों कंपनी ल राज्य सरकार के स्वास्थ्य विभाग डहर ले कुल 75 लाख वैक्सीन के आर्डर दे गे हावयं। छत्तीसगढ़ के अब तक मिले 1.5 लाख कोवैक्सीन के खातिर भारत बायोटेक ल 6 करोड़ 30 लाख रूपिया के भुगतान करे गे हावय, इही रकम ले 2.9 लाख अप्राप्त कोविशील्ड डोज के खातिर सीरम इंस्टीट्यूट ल 9 करोड़ 35 लाख 89 हजार 650 रूपिया के अग्रिम भुगतान करे जा चुके हावय। प्रदेश के 28 जिला म 05 मई 2021 के स्थिति म 18 ले 44 उमर वर्ग के 42,903 लोगन के टीकाकरण करे जा चुके हावय।

टीकाकारण के तिसरइया दौर म छत्त सगढ़ म नेता मन अपने-अपने एक दूसर के टांग खिचे ल लगगे हावय, उनला जनता के फिकर नइये। जिम्मेदार विपक्षी पार्टी तको 15 साल तक सत्ता म रेहे के बाद भी आम जनता के बने जिकर नइ करत हावय जबकि केन्द्र म उंकर सरकार हावय। जेन ल जनता, अपन नेता चुनके भेजे हावय उहूं मन अपन पार्टी कोति जादा बुता करत हावय जनता ल अपन हाल म छोड़के। 18 ले उपर वाले मनके टीका म सरकार के कहना हावय के खुराक के कमी हावय ऊपर ले अब ओमा गरीब मनला पहिली प्राथमिकता म तको सवाल खडे़ होगे हावय। बहरहाल टीका तो सबो ल लगना हावय फेर पर्याप्त मात्रा म टीका के खुराक आवय तो सही।  

स्वास्थ्य विभाग ले मिले जानकारी के मुताबिक भारत बायोटेक ल 26 अप्रैल के मेल के माध्यम ले आर्डर करे गे रिहिस। भारत बायोटेक के सीईओ कृष्णा इल्ला ले आर्डर के संबंध म अरजी करे गे रिहिस। सीरम इंस्टीट्यूट ल भी 26 अप्रैल के मेल के माध्यम ले आर्डर करे गे रिहिस। सीरम इंस्टीट्यूट के सीईओ आदर पूनावाला ले वैक्सीन आर्डर के संबंध म अरजी करे गे रिहिस। भारत सरकार डहर ले 18 ले 44 साल उमर वर्ग के खातिर टीका के खुराक राज्य कोष ले क्रय करे अउ ए उमर वर्ग के नागरिक मनके टीकाकरण करे के अनुमति प्रदान करे गिस हावय। इही आधार म छत्तीसगढ़ राज्य सरकार डहर ले वैक्सीन के दुन उत्पादक म 75 लाख वैक्सीन डोज के मांग भेजी गे हावय। सरकार डहर ले सबो ये फइसला ले गे हावय के राज्य के सबो नागरिक ल फोकट म टीका लगाये जाही।