भाजपा नेता मन छत्तीसगढ़ म कोरोना के अव्यवस्था ल लेके राज्यपाल ले मिलिस

अंजोर.रायपुर, 10 मई 2021। दुनिया भर म कोरोना राई सचरे हावय, जेन बखत साव-चेत होना रिहिस ओ बखत नेता मन चुनई म फतके रिहिस अब बेरा निकाल के आम जनता खातिर गुनान करत हावय। इही बने बखत आए जब राजनीति ले उपर उठके आम जनता बर कुछ करय। इही ओढ़र म छत्तीसगढ़ के मुख्य  विपक्षी दल के नेता मन प्रदेश राज्यपाल ले राजभवन म भेट करिन। 

मिले आरो के मुताबिक कोरोना जइसे वैश्विक महामारी ले सुचारू रूप ले निपटे खातिर भाजपा के प्रदेश अध्यक्ष विष्णुदेव साय के नेतृत्व म वरिष्ठ भाजपा नेता डॉ. रमनसिंह, बृजमोहन अग्रवाल, अजय चंद्राकर, शिवरतन शर्मा, सुनील सोनी अउ श्रीचंद सुंदरानी मन राज्यपाल ले मिलिस अउ भूपेश सरकार के असफल नीति मनले प्रदेश म फैलत अव्यवस्था के बारे म जानकारी अउ सुझाव के पाती दिस। जानबा होवय के भाजपा के नेता मन मुख्यमंत्री भूपश बघेल ले मुलाकात के बेरा मांगे रिहिस जेमा मुखिया कोति ले ऑनलाइन मिटिंग बर 12 मई करार करे गे हावय।