दुर्व्यवहार मामला म सूरजपुर म कलेक्टर के तबादला, गौरव कुमार सिंह होही सूरजपुर के नवा कलेक्टर

अंजोर.सूरजपुर, 23 मई 2021। सूरजपुर कलेक्टर कोरोना लॉकडाउन के पालन कराये खातिर सड़क म उतरे रिहिस, उहीच भर नहीं सबो राज अउ देश के कलेक्टर मन जीव होम के बुता करत हावय। फेर सूरजपुर कलेक्टर रणबीर शर्मा के बेवहार ले आज समाज म बने संदेश नइ जात हावय। सोशल मीडिया म कलेक्टर ल एक युवक के मोबाइल ल पटके अउ थप्पड़ मार के पुलिस तिर डंडा ले पिटवाये वीडियो वायरल होए हावय। 

इही मामला ल संज्ञान लेवत प्रदेश के मुखिया दाऊ भूपेश बघेल ह जानकारी देवत लिखिस के सोशल मीडिया के माध्यम ले सूरजपुर कलेक्टर रणबीर शर्मा डहर ले एक नवयुवक ले दुर्व्यवहार के मामला मोर जानकारी म आए हावय। येहा बहुत ही दुखद अउ निंदनीय आए। छत्तीसगढ़ म अइसन कोनो कृत्य कतई बर्दाश्त नइ करे जा सकय। ओमन आगू किहिन के कलेक्टर रणबीर शर्मा ल तत्काल प्रभाव ले हटाये के निर्देश दे दिए गे हावय। 

कोनो भी अधिकारी के शासकीय जीवन म अइसन आचरण स्वीकार्य नइ करे जाए। ये घटना से क्षुब्ध हवं, युवक अउ ओकर परिजन ले खेद व्यक्त करत हवं। श्री बघेल ह यहू निर्देश दे हावयं के सूरजपुर म कलेक्टर डहर ले युवक के संग दुर्व्यवहार के बखत टूटे मोबाइल के प्रतिपूर्ति के रूप म ओला नवा मोबाइल फोन उपलब्ध कराये जाए।

राज्य सरकार कोति ले मिले आरो के मुताबिक छत्त्तीसगढ़ शासन ह भारतीय प्रशासनिक सेवा के दू अधिकारी के नवा पदस्थापना आदेश जारी करे हावय। जेकर तहत रायपुर जिला पंचायत के मुख्य कार्यपालन अधिकारी गौरव कुमार सिंह ल सूरजपुर जिला के नया कलेक्टर पदस्थ करे गे हावयं उहें रणवीर शर्मा ल कलेक्टर सूरजपुर ले तबादला करत तुरते प्रभाव ले मंत्रालय म संयुक्त सचिव (प्रतीक्षारत) के पद म पदस्थ करे गे हावय।