भूपेश सरकार के बड़का फइसला किसान मनके दू साल के पानी के पइसा माफ

अंजोर.रायपुर, 12 मई 2021। मुख्यमंत्री भूपेश बघेल ह सरलग गरीब, मजदूर अउ किसान मनके हित बर बुता करत हावय। धान के बोनस बर राजीव गांधी किसान न्याय योजना, नरवा-गरूवा-घुरवा-बारी ले गांव ल आत्मनिर्भर बनाये के संगे-संग लॉकडाउन म मनरेगा बुता सुरू कर के बता दिस के वो किसान हितवा आए। आज भूपेश सरकार ह किसान मनके हित म एक अऊ बडका फइसला ले हावय के उंकर पानी के पाछू दू साल के पइसा ल माफ करे जाही। 

एजेंसी ले मिले आरो के मुताबिक सोशल मीडिया के मार्फत ले आरो करे गे हावय के छत्तीसगढ़ के किसान मनके पाछू दू साल के जल कर के बकाया राशि हमार सरकार ह माफ करे के ऐतिहासिक फइसला ले हावय। कांग्रेस सरकार के ये महत्वपूर्ण फइसला ले कोरोना संकट काल म प्रदेश के 20 लाख पंजीकृत किसान मनला 400 करोड़ रूपिया के बचत होही जेमा ले ओमन ला आर्थिक रुप ले फायदा मिलही।