कानून बेवस्था के संग पुलिस ल लोगन के भूख के संसो, ज़रूरत मंद ल बांटत हावय भोजन

अंजोर.दुर्ग, 15 मई 2021। कोरोना महामारी के ये दूबर दिन ल झेलत दू बछर होगे। कभू-कभू तो पहिली ले जादा तपे कस लागथे कोरोना ह। फेर ये पइत पुलिस ह जबर सहराये के लइक बुता करत हावय। सड़क म उतर के डंडा भांजे ल छोड़ लोगन ल मया ले समझावत हावय। दिन बने नइये, सबो ल समझके एक दूसर के मदद करे के बखत हावय।

इही ओढ़र म पुलिस अधीक्षक दुर्ग प्रशांत ठाकुर के निर्देश म थाना प्रभारी भिलाई डहर ले गरीब, निराश्रित, असहाय ज़रूरत मंद लोगन के सूची बनाके अग्रवाल समाज सेक्टर 6 के सहयोग ले ओमन ल रोज भोजन के पैकेट्स दे जावत हावय। उनला दूनो बखत के खाना बने बेरा म मिल सके ले उंकर देह बने रइही अऊ रोग राई ले लड़े म बल मिलही।