अंजोर.अम्बिकापुर, 13 मई 2021। लॉकडाउन बखत म दुकान खोलके गहना बेचे म जिला प्रशासन के डहर ले दुकान संचालक ल 20 हजार रूपिया के जुर्माना लगाये गिस अउ लॉक डाउन बखत म दुकान बंद रखे के समझाईश दीस। एसडीएम प्रदीप साहू के बताती निरीक्षण के बखत अम्बिकापुर के सदर रोड के कन्हैया अलंकार मंदिर ज्वेलरी शॉप के दुकान संचालक बाहिर ले दुकान बंद करके अंदर ज्वेलरी बेचत पाये गिस। येमा लॉकडाउन नियम के उल्लंघन करे के सेती दुकान संचालक ल 20 हजार रूपिया के जुर्माना लगाये गिस। जानबा होवय के अक्तीं के मउका म गवई म अबड़ बर-बिहाव के आयोजन होवत हावय जेकर ले सोना-चांदी के गहना के मांग बढ़गे हावय। येकर फायदा उठाये के खातिर गहना दुकान संचालक नियम के उल्लंघन करत रिहिन हावय।
कलेक्टर संजीव कुमार झा के निर्देश के मुताबिक आने-आने टीम के डहर ले निगम क्षेत्र अउ गवई क्षेत्र म नियम के उल्लंघन करइया मन उपर कार्यवाही करे जात हावय। लॉकडाउन बखत म बेवजह घूमइया अउ बिना मास्क के आने-जाने वाला मनला जुर्माना लगाये जात हावयं। कोरोना के प्रसार ल रोकने के खातिर दुकान मनला बंद रखे के समझाईश दे जात हावय।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।