अंजोर.ओडिशा ए. 26 मई 2021। चक्रवाती तूफान ‘यास’ ह बंगाल अउ ओडिशा म जादा रार मचाये हावय। मिले आरो के मुताबिक ओडिशा राज म यास पहुंच गे हावय अउ गजब हवा पानी के संग घर-दुवार के राहित छड़ा दे हावय। समुद्र के पानी के लाहरा बिहराल हावय, हवा के संग कतको के घर-बार उड़ागे, रूख-राई उजरगे। कतकोन रसता म पेड़ गिरे परये हावय।
ओडिशा सरकार ह अगाहू आरो पाके सचेत होगे रिहिस अउ लोगन मनला बने ठउर म उमराये के बुता तको करिन। फेर गरेरा तो अपने रंग देखाबेच करही, ओडिशा के भद्रक जिला के तट ले टकराये के बाद समुद्र के पानी बस्ती कोति ठेलागे हावय। अउ 120 किलोमीटर प्रति घंटा के रफ्तार ले हवा चलत हावय। ओडिशा के चांदीपुर अउ बालासोर जिला म लोगन मनके जानमाल के जतन खातिर सरकार जूझत हावय।
ओडिशा के मुख्यमंत्री नवीन पटनायक ह सोशल मीडिया के माध्यम ले आरो करे हावय के राज्य सरकार ह Cyclone Yaas ले प्रभावित क्षेत्र म बहाली के खातिर प्रतिबद्ध हावय। ओडीआरएएफ के कर्मचारी पारादीप नगर निगम क्षेत्र म बहाली के प्रयास करत हावय बालेश्वर के सिमुलिया क्षेत्र म सड़क सफाई कार्य शुरू होगे हावय। सुंदरगढ़ जिला प्रशासन कोति ले एहतियाती कदम उठात नुआगांव, कुआमुंडा, बिसरा, लाठीकाटा, लहुनीपाडा, कोयडा अउ गुरुंडिया ब्लॉक के 5 हजार ले आगर लोगन बने ठउर म अमराये गे हावय। संग ओमन के भोजन-पानी के बेवस्थग तको करे जात हावय।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।