अंजोर.सूरजपुर, 28 मई 2021। थाना प्रभारी रामानुजनगर ल मुखबीर ले मिले आरो म गांव साल्ही के मनोज साहू जेकर आमगांव म चिमनी ईंट भट्ठा हावय उहां अवैध रूप ले चोरी के कोइला खपाये जात हावय अउ उहां चोरी के कोइला बोरी म रखे हावय। जेकर बारे म पुलिस अधीक्षक सूरजपुर राजेश कुकरेजा के ल बाताये गिस। ओमन तुरते दबिश देत कार्यवाही करे के निर्देश दिस।
अतिरिक्त पुलिस अधीक्षक हरीश राठौर अउ एसडीओपी प्रेमनगर प्रकाश सोनी के मार्गदर्शन म रामानुजनगर पुलिस ह मनोज साहू के आमगांव के चिमनी ईट भट्टा म दबिश देके उहां अवैध रूप ले चोरी के कोइला 70 बोरी म कुल 5 टन कीमत 30 हजार रूपिया के पाये गिस। जेकर संबंध म वैध दस्तावेज के मांग करे म कोनो दस्तावेज प्रस्तुत नइ करे गिस। जेन कोइला चोरी के होए के पूरा अंदेशा म ईंटा भट्ठा संचालक मनोज साहू पिता स्व. प्रसाद साहू उमर 40 साल निवासी साल्ही, थाना रामानुजनगर अउ ईंट भट्ठा के मुंशी संजय सिंह पिता मनी प्रसाद निवासी नीमपारा, थाना विश्रामपुर ले 5 टन चोरी के कोइला अउ इलेक्ट्रानिक कांटा जप्त करके दुनों के विरूद्ध धारा 41(1-4) जा.फौ./379 भादवि के तहत् कार्यवाही करे गिस।
मिले आरो के मुताबिक ए कार्यवाही म थाना प्रभारी रामानुजनगर बिपीन लकड़ा, एएसआई बृजेश यादव, आरक्षक दीपक यादव, अनुज यादव, रामसागर साहू, शिव सिंह अउ महिला आरक्षक तेरेसा तिग्गा सक्रिय भूमिका रिहिन।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।