अंजोर.महासमुंद, 07 मई 2021। महासमुंद जिला जेल ले दीवार कूद के 5 कैदी मनके फरार होए के घटना म गृह अउ जेल मंत्री ताम्रध्वज साहू ह जेल प्रशासन के वरिष्ठ अधिकारी मन ल तुरते कार्रवाई के निर्देश दे रिहिस। मामला म घोर लापरवाही बरते के सेती मुख्य प्रहरी सहित तीन प्रहरी ल तुरते प्रभाव ले निलंबित करके दे गे हावय।
मिले आरो के मुताबिक मुख्यालय जेल अउ सुधारात्मक सेवा छत्तीसगढ़ रायपुर डहर ले आज जारी निलंबन चिट्ठी म केहे गे हावय के सी.सी.टी.व्ही फूटेज अउ परिस्थिति के आधार म 6 मई 2021 के दोपहर 2 बजे ले संझा 6 बजे तक तैनात मुख्य प्रहरी राजकुमार त्रिपाठी अउ प्रहरी गणेश कुमार एक्का, भरतलाल सेन अउ सुखीराम कोसले ल कर्तव्य के प्रति घोर लापरवाही बरते के सेती तुरते प्रभाव ले निलंबित करे गे हावय।
जेल मुख्यालय ले जारी चिट्ठी म केहे गे हावय के जिला जेल महासमुंद म परिरूद्ध पांच विचाराधीन बंदी धनसाय उमर 33 वर्ष, डमरूधर उमर 24 वर्ष, राहुल उमर 22 वर्ष, दौलत उमर 23 साल अउ करन उमर 21 साल आने-आने धारा के तहत जेल म रिहिस। ये पांचों कैदी लगभग मंझन 3 ले 3.30 बजे बैरक नम्बर 5 ले लगे दीवार म दू बंदी के उपर एक बंदी चढ़के टयूब राड के पट्टी के सहारा एक गमछा अउ एक शॉल ल जोड़के हुक ल सोलर फ्रेंसिंग वायर के क्लेम्प म फंसाइन अउ उंकर सहारा पांचों बंदी बारी-बारी ले चढ़के जेल ले फरार होगे। फरार पांच बंदी म ले तीन बंदी डमरूधर, दौलत अउ करन ल फेर गिरफ्तार करके लिस हावय। अउ आन दू बंदी धनसाय अउ राहुल के तलाश चलत हावय।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।