अंजोर.दुर्ग। जिला म कोविड संक्रमण के स्थिति ल देखत जिला प्रशासन ह 6 ले 14 अप्रैल तक पूरा जिला म लॉकडाउन के फइसला लिस हावय। कलेक्टर डॉ. सर्वेश्वर नरेंद्र भुरे ह आम नागरिक ले अपील करे हावय के जिला म संक्रमण के प्रसार ल नियंत्रित करे खातिर ये बहुत जरूरी हावय के लॉकडाउन के माध्यम ले कोरोना के गतिशीलता ल नियंत्रित करे जाए। येकर खातिर नागरिक के सहयोग बेहद जरुरी हावय। पहिली म जिला म लॉक डाउन लगाए गे रिहिस अउ जन सहयोग ले कोरोना के पहली लहर ल रोक पाये म सफलता मिले रिहिस।
ए बार भी कोविड संकट के दौर म धैर्य के जरूरत हावय ताकि कोविड संक्रमण के प्रसार के नियंत्रित करे जा सके। कलेक्टर ह नागरिक मनले अपील करे हावय के घर म रहन, सुरक्षित रहन। पिछली बार असन हमन लॉक डाउन म सम्पूर्ण संयम के परिचय देत कोविड के गंभीरता ले पूरा बच सकबोन। ओमन 45 साल ले जादा उमर के सबो नागरिक ले नजदीकी टीकाकरण केंद्र पहुंचके टीका लगवाये के आग्रह करे हावय। कलेक्टर ह किहिन हावय के जिला म ये कठिन परिस्थिति हावय। यदि ए समय पूरा संयम अउ दृढ़ता ले ये परिस्थिति ले मुकाबला करे तो निश्चय ही हम अपन परिवारजन अउ प्रियजन ल ए विपदा ले सुरक्षित रख सकबोन।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।