कोविड टीकाकरण केंद्र लखनपुर, अंधला, रामनगर, सानीबर्रा, केदमा के कलेक्टर करिस निरीक्षण

अंजोर.अम्बिकापुर। जिला कलेक्टर ह लखनपुर जनपद के ग्रामीण कोविड टीकाकरण केंद्र हेल्थ अउ वेलनेस सेंटर लखनपुर, प्राथमिक स्वास्थ्य केंद्र अंधला के संग ही उदयपुर जनपद के रामनगर, सानीबर्रा, केदमा अउ मतरिंगा केन्द्र के निरीक्षण करके व्यवस्था के जायजा लिस। ओमन 45 साल ले जादा उमर के लोगन ल कोरोना के टीका लगाये के खातिर गांव पंचायतवार सूची तइयार करके सरपंच, सचिव अउ रोजगार सहायक ल सबो पात्र लोगन के टीकाकरण केंद्र तक लाने बर प्रोत्साहित करे के निर्देश दिस।

कलेक्टर ह किहिन के सबो केंद्र म रोज 200 लोगन के टीकाकरण के लक्ष्य निर्धारित करे गे हावय। केंद्र म शत-प्रतिशत टीकाकरण होना चाही। अप्रैल महीना म हर दिन टीका लगना हावय। ए म पूरा रकम ले अमल करें। टीकाकरण केंद्र म लाभार्थी मनके सुविधा के ध्यान रखें। ओमन बढ़त तापमान ल देख टीकाकरण केंद्र म शीतल पयेजल बर मटका म पानी रखे अउ टेंट लगाके बैठे के व्यवस्था करे के निर्देश दिस। ओमन किहिन के कोनो लाभार्थी के टीकाकरण के बाद कोनो रकम के समस्या आत हावय तो तत्काल उच्च अधिकारी के सूचित करें। टीकाकरण के खातिर गांव म कोटवार के माध्यम ले मुनादी करावे। शिक्षा विभाग सहित आन विभागीय अमला के भी टीकाकरण अभियान म शामिल हाके ग्रामीण ल टीकाकरण बर प्रोत्साहित करे ल किहिन। कलेक्टर ह दूरस्थ गांव मतरिंगा म बिंझवार जनजाति के लोगन ले चर्चा करके उंकर समस्या ले अवगत होइन। ओमन पानी के व्यवस्था बर कूप खनन कराये अउ खराब पड़े सोलर पैनल ल सुधारे के निर्देश दिस। ए बखत जिला पंचायत के सीईओ विनय कुमार लंगेह, एसडीएम उदयपुर अनिकेत साहू, सीएमएचओ पीएस सिसोदिया, तहसीलदार श्रीमती शिवानी जायसवाल, जनपद सीईओ अजय सिंह, पारस पैंकरा सहित आन अधिकारी मौजूद रिहिस।