प्रदेश म बाढ़त कोरोना ल लेके पूर्व मंत्री बृजमोहन अग्रवाल ह मुख्य सचिव ले मिलिस

अंजोर.रायपुर। छत्तीसगढ़ म फेर कोरोना के बिकराल रूप देखे बर मिलत हाबे, संक्रमण के आंकड़ा पाछू बछर ले चार गुना रफ्तार म हावय। शासन कोति ले कोनो बने ठोस फइसला नइ करे के सेती आज ये स्थिति बने हावय। इही सब बात के संसो करत प्रदेश के पूर्व मंत्री अउ विधायक बृजमोहन अग्रवाल ल मुख्य सचिव अमिताभ जैन ले मंत्रालय म मुताकात करिन। 

मिले आरो के मुताबिक पूर्व मंत्री श्री अग्रवाल ह प्रदेश म कोरोना के भयावह स्थिति ल देखत मुख्य सचिव ले कोविड के इलाज, बेड, ऑक्सीजन, वेंटिलेटर सहित आने-आने विषय म चर्चा करिन। ये मउका म उंकर संग रायपुर सांसद सुनील सोनी, विधानसभा नेता प्रतिपक्ष धरमलाल कौशिक अउ पूर्व मंत्री अजय चंद्राकर तको उपस्थित रिहिस।