मुख्यमंत्री ह रोड सेफ्टी टी 20 वर्ल्ड क्रिकेट सीरीज के मैच म कोविड प्रोटोकॉल के पालन के दिस निर्देश
अंजोर.रायपुर। कोरोना के कहर फेर लहुंटत हाबे, दिनो दिन मरीज के गिनती बाढ़त हाबे। अइसन म फेर सरकार ह कड़ाई निर्देश देतव हाबे फेर उंकर आदेश म तब लोगन के भरोसा टूटथे जब एक बड़का वर्ग के लोगन ल येमा छूट मिल जथे। एक कोति रायपुर के सड़क म उतरके प्रशासन ह रद्दा रेंगइया मन ले मास्क नइ लगाये म जुर्माना के वसूली करत हाबे उहंचे दूसर कोति नवा रायपुर के शहीद वीर नारायण अंतर्राष्ट्रीय क्रिकेट स्टेडियम म चलत क्रिकेट के मैच म दर्शक मन बिगर मास्क के नियम कायदा ल ताक म रखके दूसर के जीव ल खतरा म डारत हाबे।
अइसन मामला के सोशल मीडिया म आए के प्रदेश के मुखिया ह संज्ञान लेवत प्रशासन ल निर्देश दिस के नवा रायपुर के शहीद वीर नारायण अंतर्राष्ट्रीय क्रिकेट स्टेडियम म रोड सेफ्टी टी 20 वर्ल्ड क्रिकेट सीरीज के खेलत मैच म दर्शक मनके संख्या स्टेडियम के क्षमता के 50 प्रतिशत ले ज्यादा नइ होना चाहि। अउ खेल के दौरान स्टेडियम के अंदर अउ बाहर कोविड प्रोटोकॉल के कड़ाई ले पालन करे जाए। ओमन अधिकारी मनला तको निर्देश दिस के मैच के दौरान दर्शक मास्क लगाये रहें। कहू दर्शक मास्क नइ लगाए पाए जाथे तव उंकरों उपर अर्थदण्ड अधिरोपित करे के संग कड़ कार्रवाई के जाए।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।