सिरपुर म 12 ले 14 मार्च तक अंतर्राष्ट्रीय बौद्ध महोत्सव

अंजोर.महासमुंद। अंतर्राष्ट्रीय सिरपुर बौद्ध महोत्सव अउ शोध संगोष्ठी के आज शुभारम्भ मुख्य अतिथि भदंत नागार्जुन सुरई ससाई, ह करिन। महासमुंद जिला के सिरपुर म आयोजित ये तीन दिवसीय समारोह म बौद्धधर्म ले जुड़े देश के जाने माने विद्वान प्रो.रतन लाल, चौथीराम यादव अउ दिलीप मंडल, अशोक दास, मधुकर कठाने, सुहेमलता महिश्वर आदि शामिल होही। महोत्सव के आयोजन छत्तीसगढ हेरिटेज एंड कल्चरल फाउंडेशन कोति ले करे जात हाबे। महोत्सव 12 मार्च ले 14 मार्च तक आयोजित होही।

सिरपुर महोत्सव म शोध संगोष्ठी म धम्म, कला-स्थापत्य, शिक्षा, संस्कृति, साहित्य, इतिहास केन्द्रित व्याख्यान होही। समारोह म देश अउ दुनिया के प्रख्यात विद्ववान भाषाविद, पुरातत्वविद, इतिहासकार, शोधकर्ताओं, लेखक, यूनिवर्सिटी के प्रोफेसर, साहित्यकार अउ बुद्धजीवी के प्रबोधन सत्र भी होही। ये मउका म छत्तीसगढ़ी कलाकार मन कोति ले रंगारंग सांस्कृतिक कार्यक्रम के प्रस्तुति होही। महोत्सव म बौद्ध विरासत म आधारित नाटक के मंचन करे जाही। महोत्सव म लघु फिल्म के प्रदर्शन, महापुरुष मनके जीवनी म पोस्टर प्रदर्शनी अउ पुस्तक के स्टॉल भी लगाये गे हाबे। महोत्सव म कला, संस्कृति, शिक्षा, साहित्यिक अउ सामाजिक सहित आन क्षेत्र म प्रेरणादायक योगदान देवइया ल सम्मानित करे जाही। बौद्ध विरासत अउ संस्कृति म आधारित प्रतियोगिता निबंध, गीत, कविता, रंगोली, रेत आर्ट, चित्रकला, पेंटिंग अउ प्रश्नोत्तरी स्पर्धा आयोजित करके विजेता ल महोत्सव के समापन अवसर म पुरस्कार प्रदान करे जाही।