नारायणपुर म नक्सली घटना : बस ब्लास्ट म 4 जवान शहीद अउ घायल मनके रायपुर म उपचार

अंजोर.नारायणपुर। प्रदेश म चलत नक्सल विरोधी बुता ले ओमन के बौखलाहट साफ दिखत हाबे, अब फेर कायता म उतरगे हावय। मिले आरो के मुताबिक डीआरजी बल के जवान मन नारायणपुर म नक्सल विरोधी अभियान के बाद जिला मुख्यालय नारायणपुर लहुंटत रिहिन। ओमन के बस कन्हारगांव-कड़ेनार रोड ले आत रिहिन तभे रसता म लगे आईईडी के चपेट म उंकर बस आगे। जेमा सवार एक वाहन चालक अउ चार जवान शहीद होगे। ये घटना म दू जवान गंभीर रूप ले घायल हावय अउ 12 झिन जवान मनला मामूली चोट आये हाबे। घटना स्थल म अतिरिक्त पुलिस बल भेजे गे हाबे अउ घायल जवान मनला उपचार के खातिर भारतीय वायु सेना के हेलीकॉप्टर ले रायपुर लाये जाथे। 

मुख्यमंत्री भूपेश बघेल ह नारायणपुर म नक्सली मन कोति ले जवान ले भरे बस के ब्लास्ट ले उड़ाये के घटना के कड़ा शब्द म निंदा करत दुखद घटना म एक वाहन चालक सहित डीआरजी के 4 जवान के शहादत म ओमन गहरा दुख प्रकट करे हाबे। शहीद जवान के परिजन मनके प्रति संवेदना प्रकट करत ओमन किहिन के सुरक्षा बल के लगातार करे जात कार्रवाई ले नक्सली मनके पैर उखड़े लगे हावय। ये घटना नक्सली मनके हताशा के परिणाम आए। ओमन आगू किहिन के नक्सली मनके खिलाफ सुरक्षा बल के अभियान अउ तेज होही। मुख्यमंत्री ह घटना म घायल जवान मनके बेहतर ले बेहतर इलाज के सुविधा उपलब्ध कराये के निर्देश अधिकारी मनला दिस, अउ प्रदेश के पुलिस महानिदेशक डी.एम. अवस्थी ल घटना के पूरा जानकारी लेके सबो आवश्यक कदम उठाये के निर्देश दिस।