अंजोर.भाटापारा। भाटापारा शहर पुलिस के डहर ले 02 दीगर राज्य यूपी के आरोपी ल पकड़े हावय। बलौदाबाजार जिला म पहली बार कोनो आन राज के आरोपी 03 देशी कटटा अउ जिंदा गोली के संग पकड़ाये हाबे। भाटापारा शहर पुलिस के डहर ले कटटाधारी आरोपी के गिरफ्तार के बड़े घटना के बाद अब अइसन वारदात म अंकुश लागाये के उदीम करे जात हावय।
जानबा होवय के भाटापारा शहर के परशु राम वार्ड म पाछू कई महिना ले सुन्ना मकान के ताला तोड़े लाखों के चोरी होत रिहिस, पुलिस के डहर ले अथक प्रयास कर जात रिहिस फेर सफलता नइ मिलते रिहिसे। शातिर अपराधी आरोपी डहर ले अइसे जगह ल चिन्हांकित करे जात रिहिन जेमा आस पास कोनो सीसीटीव्ही कैमरा नइ होवे। फेर एक घटना 18-03-2021 के अपराधी डहर ले वीआईपी कालोनी म शातिराना तरीका ले लाखों के चोरी करे गिस जेमा पुलिस अधीक्षक महोदय आई.के.एलेसेला के डहर ले थाना प्रभारी भाटापारा शहर ल चोर ल जल्द ले जल्द पकड़े के निर्देश दिये गे रिहिस।
पुलिस के बताये मुताबिक थाना भाटापारा शहर निरीक्षक विजय चौधरी के डहर ले विशेष टीम के गठन करके घटना स्थल म सीसीटीव्ही कैमरा के मदद ले देखे गिस के एक बीना नंबर काला रंग के पल्सर ले घटना स्थल के रेकी करे गे रिहिस जेकर बाद आरोपी डहर ले बड़े शातिराना तरीका ले घटना ल अंजाम दे गिस। भाटापारा शहर पुलिस डहर ले सीसीटीव्ही कैमरा फुटेज ल चेक करे म आरोपी काला रंग के पल्सर म भागत दिखगे जोन कुछ दुरी के बाद कच्चा रसता के अपयोग करिन फेर आगू नइ दिखिस। लगभग 150 ले 200 सीसीटीव्ही कैमरा के फुटेज ल चेक करके अंतत: आरोपी परशुराम वार्ड के ही अपन घर म मिलगे जिहां हीरो ईगनाईटर मोटर सायकल जो आरोपी डहर ले उपयोग करे गे रिहिस पुलिस के हाथ लगगे।
पकड़ाये 2 आरोपी म एक नबालिक अउ एक आरोपी शिवम राजपुत ल गिरफ्तार करके उंकर तिर ले चोरी के 317800 रूपिया के सोने चांदी के गहना, 1 मोटरसाइकिल कीमती 65000 कुल 412800 रुपिया अउ तीन देशी कटटा जिन्दा गोली के संग पकड़े गिस। दूनो आरोपी उत्तर प्रदेश राज्य के होना बताये गे हावय। आरोपी राघवेन्द्रा राजपुत, दीपेन्द्रा राजपुत चोरी के आन सम्मपत्ति ल बटवारा करके संग ले जाना बताये हाबे। पुलिस के मुताबिक ये आरोपी ल गिरफ्तार करके जेल दाखिल करे गिस। आरोपी डहर ले यहू बताये गिस के ओमन अपन आन संगी संग रायपुर, बिलापुर म तको कोनो बड़े घटना ल अंजाम दे रिहिन।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।