अंजोर.अम्बिकापुर। छत्तीसगढ़ शासन के स्वास्थ्य अउ परिवार कल्याण मंत्री टीएस सिंहदेव ह तको शनिवार के आयुष्मान कार्ड बनवाईस। ओमन पात्रता अनुसार आयुष्मान कार्ड बनवाके शासन के योजना के लाभ उठाये के अपील करिन हावय। जिला म अब तक 3 लाख आयुष्मान कार्ड बनाये जा चुके हावय जबकि लक्ष्य करीब 10 लाख कार्ड बनाये के हावय।
जानबा होवय के जिला के च्वाइस सेंटर या कामन सर्विस सेंटर म आयुष्मान कार्ड निःशुल्क बनाए जात हावय। आयुष्मान कार्ड बनाये के तिथि एक माह बढ़ा दीस हावय। अब आयुष्मान कार्ड 30 अप्रैल 2021 तक बनही। राष्ट्रीय स्वास्थ्य प्राधिकरण डहर ले पहिली हितग्राही के आयुष्मान कार्ड बनाये के तिथि 31 मार्च निर्धारित करे गे रिहिस।
कार्ड बनाये के खातिर हितग्राही ल राशनकार्ड के संग अपन आधार कार्ड लेके च्वाइस सेंटर जाना होही। परिवार के पात्रता के आधार म क्रियाशील अंत्योदय कार्ड, प्राथमिकता राशन कार्डधारी परिवार अउ सामाजिक-आर्थिक संगणना 2011 ले चयनित परिवार ल पांच लाख रूपिया तक ईलाज के खातिर सालाना सुविधा ए कार्ड ले मिलही। इही रकम ले शेष राशनकार्ड धारी परिवार ल सालाना 50 हजार रूपिया तक के निःशुल्क ईलाज के सुविधा पंजीकृत शासकीय अउ निजी चिकित्साल म आयुष्मान कार्ड के डहर ले मिलही। च्वाइस सेन्टर म कोरोना ले बचाव संबंधी निर्देश के पालन करे केहे गे हावय, सेन्टर म मास्क लगाके प्रवेश करे। च्वाइस सेन्टर संचालक ल भीड़ कम करे के खातिर कार्ययोजना बनाके काम करे बर तको केहे गे हावय।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।