थाना म होइस महिला कांस्टेबल के गोद भराई के रस्म, रायगढ़ पुलिस के सुघ्घर उदीम

अंजोर.रायगढ़। पुलिस के बिगर अपराध रहित समाज के परिकल्पना नी करे जा सकय। जिला म अपराध ल कम करे खातिर कानून व्यवस्था ड्यूटी, वीवीआइपी ड्यूटी के अलावा अऊ केऊ जिम्मेदारी पुलिस ऊपर रिथे। अउ से सब के बीच कोनो पुलिस अधिकारी अउ जवान मनला अपन निजी अउ व्यवसायिक जीवन म तालमेल बिठाना मुश्किल होथे। अइसन म रायगढ़ जिला के थाना सरिया म पदस्थ महिला कांस्टेबल लीलावती के गोद भराई के थाना म रस्म पूरा करे के आरो ह बढ़ नीक अउ सीख के हावय। 

मिले आरो के मुताबिक महिला कांस्टेबल लीलावती अपन स्वजन ले दूरिहा रिथे, ओकर पति जेन केन्द्रीय रिजर्व पुलिस बल (CRPF) म हावय वो अभी जम्मू कश्मीर म तैनात हाबे। पत्नी की गोद भराई म घर नी आ सकत हाबे अउ गर्भवस्था के सेती महिला कांस्टेबल अपन ससुराल ओडिसा नी जा सकत हाबे। ए बखत म प्रभारी सरिया निरीक्षक डी.के. मार्कण्डेय अपन धर्म पत्नी के साथ महिला कांस्टेबल लीलीवती उरांव के गोद भराई के रस्म पूरा रीति रिवाज ले करिन। ये मउका म थाना स्टाफ के संग ओकर मां ह तको आए रिहिन सब्बो झिन गोद भराई के रस्म थाना म करत दीर्घायु अउ उज्ज्वल भाविष्य के आशीर्वाद दीस।