करिया चाउर के खेती ले जबर मुनाफा कमावथे किसान, औषधि गुण के सेती बजार म बने मांग

अंजोर.धमतरी। अब बजार म करिया रंग के चाउर देखके अचरज झिन होहू काबर के अब हमर छत्तीसगढ़ म येकरो खेती होए लगे हावय। धमतरी जिला के किसान अब येला बोवत हाबे। ये चाउर ह औषधीय गुण ले भरपूर हावय जेमा सेलेनियम (एंटी कैंसर), एन्थ्रोसायनिन (एंटी एजेंट, एंटी ऑक्सीडेंट), जिंक, आयरन, फॉलिक एसिड, कैल्शियम अउ फाइबर भरपूर मात्रा म रिथे। ये चाउर ल कैन्सर, मोटापा, ब्लड प्रेशर, कुपोषण, सिकल सेल, एनीमिया म लाभकारी माने गे हावय संग म येहा इम्यून सिस्टम ल मजबूत रखे म सहायक होथे। ब्लैक राइस याने करिया चाउर के बाजार म बने कीमत मिलथे। मिले आरो के मुताबिक ब्लैक राइस के उत्पादन के खातिर प्रदेश म सबसे पहिली धमतरी जिला के परसवानी निवासी प्रगतिशील किसान गजेन्द्र चन्द्राकर ह असम ले बीजहा मंगाके येला उगाइन। आत्मा योजना के तहत कुरूद के हतबंध म 15 एकड़ म ब्लैक राइस के प्रदर्शनी लगाये गे रिहिसे। जानबा होवय के 2018-19 म जिला म औषधीय गुणयुक्त ब्लैक राइस (कृष्णम) 70 एकड़ के क्षेत्र म बतौर प्रदर्शन बर लगाये रिहिन। उहे 35 एकड़ के क्षेत्र म मधुराज 55, महाजिंक 27 एकड़ म अउ 8 एकड़ म लोहन्दी (जिंक) के प्रदर्शनी किसान के खेत म लगाये गे रिहिसे। किसान मन तैयार उत्पाद ल राष्ट्रीय अउ राज्य स्तरीय प्रदर्शनी म लेग के एक नवा चिनहारी देवाइस। 

येकर बर प्रदेश म साल 2019 म राजधानी रायपुर म आयोजित अंतर्राष्ट्रीय क्रेता-विक्रेता कृषक सम्मेलन म जिला के कुरूद के ओजस्वी कृषक उत्पादक संगठन अउ कृषक रामलाल भतपहरी, थनेन्द्र साहू ह 110 क्विंटल ब्लैक राइस के सम्मेलन म आए निर्यातक ले अनुबंध करिन। प्रति किलो ब्लैक राइस के दर 100 रूपए तय होइस। सिलसिले ल आगू बढ़ावत 2019-20 म आत्मा योजना के तहत कृषक प्रदर्शन के रूप म 30 एकड़ म ब्लैक राइस के फसल लगाये गे रिहिसे। अभी के बेरा म किसान थनेन्द्र साहू, केजूराम देवांगन, लोकेश साहू, हरीश साहू अउ राजेश डोटे, केजुराम देवांगन उक मन जैविक पद्धति ल तइयार करे ये फसल के खेती ले आय म बढ़ोत्तरी के संग पर्यावरण ल खेत ल प्रदूषित होए ले तको बचावत हाबे।