गिधवा-परसदा पक्षी विहार महोत्सव : छत्तीसगढ़ म पहली बार होइस पक्षी महोत्सव

अंजोर.बेमेतरा। बेमेतरा जिला के नवागढ़ विकासखण्ड म ‘गिधवा-परसदा पक्षी विहार महोत्सव’ के आयोजन करे गे हावय। जिहा मुख्यमंत्री श्री भूपेश बघेल ह किहिन हावय के ‘गिधवा-परसदा पक्षी विहार’ ल विश्व स्तरीय पर्यटन स्थल के रूप म विकसित करे जाही। छत्तीसगढ़ के ये पक्षी विहार ल अंतर्राष्ट्रीय मानचित्र म स्थापित करे खातिर हर संभव कदम उठाए जाही। पक्षी विज्ञान, प्रकृति प्रेमी अउ इहां अवइया सैलानी मन खातिर सबो सुविधा विकसित करे जाही। इहां केउ देश के विश्व प्रवासी पक्षी मनके आवागमन होथे। खास करके नवम्बर ले मार्च त 5 महीना इहां पक्षी रहवास करथे। 

ये मउका म श्री बघेल ह गिधवा-परसदा जलाशय के भ्रमण करिन अउ उहां कई प्रजाति के पक्षि अउ जलाशय के मनोरम अउ विहंगम दृश्य ल कैमरा म कैद करिस। ये मउका म वन अउ परिवहन मंत्री मोहम्मद अकबर, संसदीय सचिव गुरुदयाल बंजारे, विधायक आशीष छाबड़ा, प्रधान मुख्य वन संरक्षक राकेश चतुर्वेदी, आईजी विवेकानंद सिन्हा, कलेक्टर शिवअनंत तायल सहित अनेक जनप्रतिनिधि अउ अधिकारी उपस्थित रिहिस।

जानबा होवय के बेमेतरा जिला के गिधवा-परसदा, नगधा, एरमशाही क्षेत्र जलीय अउ स्थल जैव विविधता ले भरपूर हावय। ये क्षेत्र पारिस्थितिकीय, स्वस्थ्य पर्यावरण के खातिर उपयुक्त हावय। गिधवा-परसदा स्थल जलीय नमी युक्त क्षेत्र हावय। येकर भौगोलिक विस्तार लगभग 06 कि.मी. क्षेत्र म हावय। गिधवा परसदा म मुख्य 02 बड़े अउ 02 मध्यम आकार के जलाशय हाबे, नजदीकी ग्राम एरमशाही म 05 जलाशय हाबे। गिधवा-परसदा जलीय तंत्र म भरपूर जलीय खाद्य वनस्पति, जीव होए के कारण इहां पक्षी मन खातिर अच्छा रहवास हावय। इहां करे अध्ययन म पक्षी मनके कुल 143 प्रजाति जेमा कुल 26 स्थानीय प्रवासी प्रजाति, 11 विदेशी प्रवासी प्रजातियां अउ 106 स्थानीय आवासीय प्रजातियां पक्षी पाए गे हावय।