जब भी स्वर्गीय चंदूलाल चंद्राकार विदेश जावे, अपन संग दातुन अउ ठेठरी खुरमी धरके जावय : सीएम बघेल

स्वर्गीय चंदूलाल चंद्राकार मेमोरियल मेडिकल कॉलेज अब होही शासकीय

अंजोर.रायपुर। मुख्यमंत्री भूपेश बघेल ह स्वर्गीय चंदूलाल चंद्राकर मेमोरियल मेडिकल कॉलेज के अधिग्रहण के घोसना करे हावय। ओमन किहिन के जल्दी ही ये मेडिकल कॉलेज ल शासकीय मेडिकल कॉलेज बनाए के प्रक्रिया सुरू करे जाही, येकर खातिर कैबिनेट म प्रस्ताव लाए जाही। ये बात के घोसना ओमन दुर्ग जिला के कचांदुर म स्वर्गीय चंदूलाल चंद्राकर के पुण्यतिथि के मउका म आयोजित कार्यक्रम ल संबोधित करत किहिन। ये मउका म ओमन स्वर्गीय श्री चंदूलाल चंद्राकार के प्रतिमा के अनावरण तको करिन। जानबा होवय के चंदूलाल चंद्राकर मेमोरियल मेडिकल कॉलेज के संचालन म दिक्कत होए के सेती प्रबंधन ह सरकार ल प्रदेश म मेडिकल एजुकेशन के बेहतरी ल देखत हुए सरकार ले ये कॉलेज के अधिग्रहण के आग्रह करे रिहिसे।

मुख्यमंत्री भूपेश बघेल ह किहिन के दुर्ग जिला म मेडिकल शिक्षा ल मजबूत करे खातिर स्वर्गीय चंदूलाल चंद्राकर के सपना रिहिस के इहां मेडिकल कॉलेज खुले,  जेमा डॉ एपी चन्द्राकर ले उंकर गोठबात के बाद क्षेत्र के पहिली मेडिकल कॉलेज खुलिस स्वर्गीय चंदूलाल चंद्राकर के देखे सपना फले फुले, अउ उंकर सुरता उम्मर रायह। स्वर्गीय श्री चंदूलाल चंद्राकर हमेशा जमीन ले जुड़े रिहिस। लगातार विदेश यात्रा करे तभो अपन छत्तीसगढ़िया स्वभाव नइ छोडि़न। जब भी विदेश जावे, अपन संब दातुन अउ ठेठरी खुरमी धरके जावय। ओमन विशाल व्यक्तित्व के धनी रिहिसे। उंकर रूचि के दायरा गजब व्यापक रिहिस। ओमन ल फोटोग्राफी के गजब शौक रिहिसे अउ देश-विदेश म रिपोर्टिंग के संग उंकर फोटोग्राफी तको मशहूर रिहिस।

ये मउका म गृह मंत्री ताम्रध्वज साहू ह किहिन के छत्तीसगढ़ राज्य के निर्माण म स्वर्गीय चंदूलाल चंद्राकर जी के योगदान बहुत अहम हावय ओमन राजनीति के साथ ही पत्रकारिता के क्षेत्र म तको अहम योगदान दे हावय। कार्यक्रम म आगू जिला के प्रभारी मंत्री मोहम्मद अकबर, पीएचई मंत्री गुरु रूद्र कुमार, महिला अउ बाल विकास मंत्री श्रीमती अनिला भेड़िया, भिलाई विधायक देवेंद्र यादव, बालोद विधायक श्रीमती संगीता सिन्हा, गुंडरदेही विधायक कुंवर सिंह निषाद मन तको अपन विचार रखिन।