पुलिस महिला रक्षा टीम ह मोहल्ल म जाके लैंगिक अपराध, घरेलू हिंसा, गुड टच-बैड टच अउ सेल्फ डिफेंस के देवत हाबे जानकारी

अंजोर.रायगढ़। एसपी संतोष सिंह के दिशा निर्देशन म जिला के पुलिस महिला रक्षा टीम कोति ले अब वार्ड, मोहल्ल म जाके महिला अउ बच्चा मनला लैंगिक अपराध, घरेलू हिंसा, गुड टच-बैड टच अउ सेल्फ डिफेंस के जानकारी देवत हाबे। मिले आरो के मुताबिक रक्षा टीम प्रभारी प्रधान आरक्षक मंजू मिश्रा अपन स्टाफ महिला आरक्षक रेविका कुजूर, आराधना आनंद के साथ वार्ड क्रमांक 13 के गाइड एंड गार्जियन स्कूल के सामने जागरूकता कार्यक्रम करिन। स्कूल परिसर के बाहर सकलाए महिला अउ बच्चा मनला घरेलू हिंसा के संबंध म जानकारी देवत कानूनी सहायता के जानकारी दीस। घरेलू हिंसा के मामला म कानूनी सहायता, मानसिक स्वास्थ्य सेवाएं, आश्रय गृह, महिला मन खातिर पैसा अर्जित करे के परियोजना, परामर्श सेवा आदि के व्यवस्था है हावय। 

अइसने लड़की मनला गुड टच-बैड टच अउ सेल्फ डिफेंस के संबंध म रक्षा टीम स्टाफ ह डेमो करके अवांछित घटना ले बचाव के बारे म बताइन। बच्चा मन अइसने कोनो घटना के आरो अपन पालक ल जरूर बतावे, लोक लाज के भय ले दबाके नी रखना चाही अइसन म बदमाश मनला अउ बल मिलथे। ये मउका म प्रभारी मंजू मिश्रा ह अंजान व्यक्ति ले सोशल मीडिया अउ ऑन लाइन चैटिंग म सतर्क रेहे के सलाह दीस अउ ओमन महिला मनला हेल्प लाइन नम्बर 1098, 1091, 112 अउ 100 के जानकारी तको दीस।