अंजोर.महासमुंद। पुलिस अधीक्षक प्रफुल्ल कुमार ठाकुर ल पाछू केऊ दिन ले आरो मिलत रिहिसे के सरायपाली बसना अउ पिथौरा क्षेत्र म भारी मात्रा म रत्न के अवैध व्यापार करे जावत हाबे। दीगर राज्य ले बहुमूल्य रत्न लाके सरायपाली, बसना, महासमुन्द क्षेत्र म खपाये जात हाबे। पुलिस अधीक्षक ह सूचना के गंभीरता ल देखत सबो थाना, चौकी प्रभारी अउ सायबर सेल टीम ले अइसना मनके चिनहार करे म लगा दिस जेन मन गोरख धंधा म संलिप्त हावय। तभे आरो मिलिस के बसना क्षेत्र के शहर म एक आदमी केऊ किसम के बहुमूल्य रत्न रखे हाव अउ बिक्री करे खातिर ग्राहक तलाश करत हाबे। सायबर सेल महासमुन्द अउ थाना बसना पुलिस के टीम कार्यवाही करत निशानदेही म मौका बसना के सराफा मार्केट म जाके संदिग्ध आदमी ल धरिस जेन सोहन सोनी ज्वेलर्स दुकान म खड़े रिहिसे। पूछताछ करे म वोहा अपन नाम भूपेन्दर सिंह चौहान पिता नारायण सिंह उम्र 43 वर्ष, वार्ड नं. 5 मोहल्ला खेड़ा चकबंदी के पास हल्दौर थाना हल्दौर जिला बिजनौर उ.प्र. के रहइया बताइस।
तलाशी म ओकर करिया रंग के बैग ले अलग-अलग पैकेट म केऊ किसम के बहुमूल्य रत्न कुल 2600 नग मिलिस जेकर मुल्य लगभग 1,00,00,000/- रूपिया बताये गे हावय। 2600 नग ल मउका म ही जप्त करे गिस अउ आरोपी के विरूद्ध थाना बसना म अप धारा 102 जौ.फौ के तहत कार्यवाही करे गिस। पूछताछ करे म ओमन बताइन के ये रत्न वेनु गोपाल जेन्स जौहरीबाजार जयपुर, राजस्थान ले लाके मध्यप्रदेश, उत्तर प्रदेश, छत्तीसगढ, ओडिशा राज्य मन म घुम-घुमके ज्वेलरी दुकान मन म बेचथे अऊ उंकर तिर कोनो प्रकार के खरीदी बिक्री के अउ रत्न ले संबंधित प्रमाणित दस्तावेज नी होना बताइन।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।